Kremlin xarici siyasət müşaviri Yuri Uşakov Rusiya Prezidenti Vladimir Putin ilə Çin lideri Si Cinpinin bugünkü görüşlərində enerji layihələrinin də müzakirə edildiyini bildirərək, "Çox vacib bir şey üzərində razılığa gəldik" deyib.
AFN.az xəbər verir ki, Uşakov Putin ilə Sinin Pekində keçirdiyi görüşdən sonra Rusiyanın dövlət kanalı "Rossiya-24"-ə açıqlamalar verib.
Çinin Ukrayna və İran da daxil olmaqla bir çox beynəlxalq məsələyə maraq göstərdiyini izah edən Uşakov "Çin beynəlxalq proseslərdə çox böyük bir rol oynayır və bunu hər kəs bilir" ifadəsini işlədib.
Putin ilə Sinin perspektivli enerji layihələrini müzakirə etdiklərini bildirən Uşakov "Digər sahələrdəki layihələri də məsləhətləşdilər. Çox vacib bir şey üzərində də razılaşdıq" deyib.
Kremlin sözçüsü Dmitri Peskov da jurnalistlərə açıqlamasında Moskvanın və Pekinin "Sibirin Gücü 2" təbii qaz boru kəməri layihəsinin əsas parametrləri ilə bağlı ümumi bir razılığa gəldiklərini bildirib.
Putinin görüşlərdə layihəyə toxunduğunu çatdıran Peskov "Ümumi mənada "Sibirin Gücü 2" ilə bağlı əsas parametrlərə, marşrut və bunun necə inşa ediləcəyinə dair bir anlayış var" ifadəsini işlədib.
Peskov layihə ilə bağlı bəzi detalların dəqiqləşdirilməsi lazım olduğunu qeyd edərək, "Bəzi nüanslar üzərində razılaşmaq lazımdır" deyib.
Layihənin icra təqvimi ilə bağlı dəqiq bir tarixin olmadığını qeyd edən Peskov "Hələ dəqiq deyil. Bu, ticarət məlumatıdır. Lakin bu, olduqca böyük bir uğurdur" qiymətləndirməsini edib.
