Vaşinqton Tehrana qarşı bütün hərbi variantları masada saxlayır...
Poliqon xəbər verir ki, ABŞ Müdafiə Nazirliyi beynəlxalq məsələlər üzrə köməkçisi Deniel Zimmerman çərşənbə axşamı Konqresdə keçirilən dinləmələrdə ABŞ qoşunlarının İrana qarşı yerüstü hərbi əməliyyat keçirməsi seçiminin mövcud variantlar sırasında qaldığını bildirib.
Nümayəndələr Palatasının Silahlı Qüvvələr Komitəsindəki dinləmələr zamanı qanunvericilər bu hərəkətin mümkünlüyünü soruşduqda Zimmerman: "Prezident özünə əlçatan bütün variantları qoruyub saxlayır", deyib.
Hörmüz boğazı yaxınlığında 5 000 əsgər hazır vəziyyətdə gözləyir
The New York Times qəzetinin məlumatına görə, ABŞ hazırda Ormuz boğazı yaxınlığında döyüşə hazır vəziyyətdə 5 000 piyada əsgəri yerləşdirib. Boğazın şərqində üzən üç desant gəmisində isə 2 500 nəfərlik dəniz piyadası ekspedisiya batalyonu fəaliyyət göstərir. Dəniz piyadaları İranla bağlı ticarət gəmilərinin blokadası əməliyyatlarında fəal iştirak edir — İran limanlarına gedən və ya oradan çıxan kommersiya gəmilərinin dayandırılması və yoxlanılması məqsədilə gəmilərə çıxarma həyata keçirilir.
Elitar 82-ci hava-desant diviziyasından 2 000 əsgər bölgədədir
Bundan əlavə, ABŞ-ın elit 82-ci Hava-Desant Diviziyasından təxminən 2 000 əsgər də Yaxın Şərqdə mövqe tutub. Pentaqon rəsmiləri onların dəqiq yerləşmə nöqtəsini açıqlamır. Amerikalı hərbiçilərin açıqlamalarına görə, desantçılar dəniz piyadaları ilə birgə İranın neft ixracatının mərkəzi olan Hark adasını da əhatə edən strateji əhəmiyyətli ərazilərin ələ keçirilməsi üçün istifadə oluna bilər.
Xüsusi qüvvələr İsfahandakı nüvə obyektini hədəf ala bilər
Mart ayında isə ABŞ Xüsusi Əməliyyatlar Qüvvələrinin bir neçə yüz döyüşçüsü Yaxın Şərqə gətirilib. Onların vəzifəsi prezident Trampın əlindəki seçimləri genişləndirməkdir. Bu seçimlər arasında İranın İsfahan şəhərindəki nüvə obyektindəki yüksək səviyyədə zənginləşdirilmiş uranın məhv edilməsi üzrə xüsusi əməliyyatlar da yer alır.
Poliqon.info
