Ukraynada davam edən siyasi gərginlik Prezident Volodimir Zelenskinin həyat yoldaşı Olena Zelenskaya qədər uzanan korrupsiya istintaqı iddiaları ilə yeni mərhələyə keçib.
"Cebheinfo.az" xəbər verir ki, Rusiyanın "Novosti" agentliyinin təhlükəsizlik mənbələrinə istinadən yaydığı məlumata görə, Ukrayna Milli Korrupsiyaya Qarşı Mübarizə Bürosu (NABU) və Xüsusi Korrupsiyaya Qarşı Mübarizə Prokurorluğu (SAP) Zelenskinin həyat yoldaşı ilə bağlı apardıqları araşdırmanı yekunlaşdırmaq üzrədir.
Həmin mənbələrin iddiasına görə, korrupsiya ilə mübarizə qurumlarının əlində Olena Zelenskinin həbs olunması üçün kifayət qədər sübut var. Bildirilir ki, araşdırma yalnız bir cinayət işi ilə məhdudlaşmır və hansı iş üzrə ilk olaraq ittiham irəli sürüləcəyinə qərar verilməyə çalışılır.
Bu vəziyyət 2019-cu ildən müharibə şəraitində ölkəni idarə edən Zelenski ailəsi üçün indiyədək görünməmiş siyasi böhranın başlanğıcı kimi qiymətləndirilir.
"Novosti"-yə danışan Rusiya təhlükəsizlik mənbələri daha diqqətçəkən iddialar da səsləndirib. Onların sözlərinə görə, Zelenski həyat yoldaşı ilə bağlı araşdırmanı Qərb tərəfdaşları ilə müzakirə edib və bu müddətdə ailəsinin təhlükəsizlik tədbirlərini gücləndirib.
Bəzi ukraynalı siyasi ekspertlərin Zelenskiyə “imic itkisini minimuma endirmək üçün” həyat yoldaşından rəsmi şəkildə boşanmağı tövsiyə etdiyi də iddia olunur. Bu məlumatların, davam edən korrupsiya araşdırmalarının Zelenski hakimiyyəti üzərində yaratdığı təzyiqi əks etdirdiyi düşünülür.
Bununla belə, qeyd olunur ki, səsləndirilən iddialar indiyədək Ukrayna rəsmiləri tərəfindən nə təsdiqlənib, nə də təkzib edilib.
Ukrayna rəsmiləri isə davam edən korrupsiya istintaqında Zelenskinin nə keçmişdə, nə də hazırda araşdırmanın tərəfi olmadığını açıqlayıb. NABU rəhbəri Semen Krivonos da Zelenskinin adının bu istintaqda hallanmadığını təsdiqləyib.
Ukrayna bir tərəfdən müharibənin ağır nəticələri ilə mübarizə apararkən, digər tərəfdən Avropa Birliyinə üzvlük məqsədi çərçivəsində korrupsiya ilə mübarizədə konkret addımlar atmağa çalışır.
NABU və SAP tərəfindən həyata keçirilən əməliyyatlar Ukraynanın beynəlxalq aləmdə etibarlı tərəfdaş kimi mövqeyini gücləndirmək cəhdinin bir hissəsi hesab olunur. Lakin Zelenski ailəsi ilə bağlı iddiaların təsdiqlənməməsi bu proseslərin siyasi motivli olub-olmaması barədə sualları da gündəmə gətirir.
Yaxın günlərdə NABU və SAP tərəfindən məsələ ilə bağlı rəsmi açıqlamaların verilib-verilməyəcəyi və istintaqın hansı istiqamətdə davam edəcəyi Ukrayna siyasətində diqqətlə izlənilən mövzulardan biri olacaq.
