ABŞ və İsrailin İranla münaqişəsi indiyədək qlobal biznesə ən azı 25 milyard dollar zərər vurub və ziyanın həcmi artmaqda davam edir. Bu barədə Reuters ABŞ, Avropa və Asiya birjalarında təmsil olunan şirkətlərin korporativ məlumatlarının təhlilinə istinadən xəbər verir. Agentliyin məlumatına görə, şirkətlər enerji daşıyıcılarının qiymətlərinin kəskin artması və Hörmüz boğazındakı vəziyyət səbəbindən təchizat zəncirlərinin pozulması ilə üzləşiblər.
Ən azı 279 şirkət İranla münaqişəni qiymət artımı və istehsalın azaldılması daxil olmaqla fövqəladə tədbirlərin görülməsinin səbəbi kimi göstərib. Digər şirkətlər dividend ödənişlərini və ya səhmlərin geri alınmasını dayandırıb, əməkdaşlarını ödənişsiz məzuniyyətə göndərib, yanacaq əlavələri tətbiq edib və ya dövlət dəstəyi üçün müraciət ediblər.
Agentliyin araşdırmasında yer alan hər beş şirkətdən biri — kosmetika istehsalçılarından kruiz operatorları və aviaşirkətlərə qədər — silahlı münaqişə səbəbindən birbaşa maliyyə itkiləri ilə üzləşdiyini bildirib. Bu şirkətlərin əksəriyyəti enerji qiymətlərinin onsuz da yüksək olduğu Avropa və Böyük Britaniyada yerləşir. Daha üçdə biri isə Asiya ölkələrinin payına düşür. Reuters qeyd edir ki, bu, həmin regionların Yaxın Şərq neft məhsullarından ciddi asılılığını göstərir.
Reuters yazır ki, xərclərin ən böyük hissəsi aviaşirkətlərin payına düşür, çünki aviasiya yanacağının qiyməti iki dəfə artıb — bu isə təxminən 15 milyard dollar təşkil edir. Agentlik vurğulayır ki, zərərlər artıq digər sahələrdə fəaliyyət göstərən şirkətlərə də yayılmağa başlayıb. Məsələn, Procter & Gamble vergidən sonrakı mənfəətinin 1 milyard dollar azalacağını gözləyir.
