“Mən rus deyiləm, yarı azərbaycanlıyam. Bu o deməkdir ki, mən yarı xristian, yarı müsəlmanam”.
Pravda.az Qafqazinfo-ya istinadən xəbər verir ki, bunu Rusiyanın Mavrikidəki səfiri İradə Zeynalova bu ölkənin mətbuatına müsahibəsində deyib.
“Avropa standartlarına görə qaradəriliyəm. Ona görə də burada, Mavrikidə insanların fərqli olduğu, müxtəlif dinlərə, millətlərə və irqlərə mənsub olduğu bir mühitdə olmaq mənim üçün yeni bir şey deyil”, - Zeynalova bildirib.
Diplomatın sözlərinə görə, bütün bu fərqlər heç bir əhəmiyyət kəsb etmir.
“İnsan insandır”, - o əlavə edib.
Qeyd edək ki, İradə Zeynalova 1972-ci ildə Moskvada anadan olub. Onun atası azərbaycanlı Aftandil Zeynalov, anası milliyətcə rusdur. Uzun illər Rusiya mediasında aparıcı və jurnalist olaraq çalışan İ.Zeynalova 2022-ci ildə Rusiya XİN-in Diplomatiya akademiyasında təhsil aldığını açıqlayıb. 2024-cü ilin sentyabrından Rusiyanın Mavrikidəki səfiri vəzifəsində çalışır.
