Astana, 15 may, AZƏRTAC
Azərbaycan Orta Dəhlizin inkişafında əsas aktor olaraq qalacaq.
AZƏRTAC xəbər verir ki, bu barədə TRACECA Hökumətlərarası Komissiyasının (HK) Daimi Katibliyinin yeni baş katibi və Özbəkistanın nəqliyyat nazirinin müavini Casurbek Çoriyev Astanada keçirilən 18-ci HKK TRACECA iclasının yekunları ilə bağlı jurnalistlərə bildirib.
“Biz Azərbaycansız keçinə bilmərik. Bütün yollar Azərbaycandan keçir - bunlar əsas limanlardır. Azərbaycanın töhfəsi hər il artır”, - deyə o vurğulayıb.
Çoriyevin sözlərinə görə, özəl sektor və Azərbaycan hökuməti infrastruktura böyük investisiyalar yatırır. O, həmçinin Ələtdə yeni aeroportun tikildiyini qeyd edib.
Yeni baş katib TRACECA ilə digər nəqliyyat təşkilatları və forumları arasında sıx əməkdaşlığın qurulmasının vacibliyini, eləcə də vacib infrastruktur layihələrinin maliyyələşdirilməsi üzrə bank sektorunun və özəl kapitalın cəlb edilməsinin zəruriliyini də vurğulayıb.
