BAKI, 14 may. TELEQRAF
PSJ Fransa çempionatında növbəti qələbəsini qazanaraq çempionluğu vaxtından əvvəl rəsmiləşdirib. Paris təmsilçisi “Lans”la görüşdə 2:0 hesabı ilə qalib gəlib.
Matçda PSJ-nin qapıçısı Matvey Safonov xüsusi performansı ilə diqqət çəkib. Rusiya millisinin üzvü rəqibin qapı çərçivəsinə ünvanladığı 8 zərbənin hamısını dəf edib və görüşün ən yaxşı futbolçusu seçilib.
Teleqraf “Opta”ya istinadla xəbər verir ki, bu, son 8 ildə PSJ qapıçısının bir oyunda 8 və ya daha çox zərbəni dəf edərək qol buraxmadığı 5-ci haldır. Safonov isə bunu bir mövsümdə iki dəfə bacaran ilk PSJ qapıçısı olub.
O, daha əvvəl mart ayında Çempionlar Liqasında “Çelsi”yə qarşı keçirilən və PSJ-nin 3:0 hesabı ilə qalib gəldiyi matçda 9 seyvlə yadda qalmışdı.
Qeyd edək ki, PSJ tarixində daha əvvəl Canluici Donnarumma, Keylor Navas və Alfons Areola da bir matçda 8 və ya daha çox seyvlə fərqləniblər.
