Ajans.az xarici mediaya istinadən xəbər verir ki, Paris Apelyasiya Məhkəməsi iyunun əvvəlində bu məsələ ilə bağlı ərizəyə baxacaq. Prokurorluq istintaqın yenidən açılmasını və iş üzrə yeni hakim təyin olunmasını tələb edir. Bildirilir ki, yeni DNT nümunələri 2018-ci ilin mayında rejissoru təcavüzdə ittiham edən ilk şəxslərdən biri – aktrisa Sand Van Roy tərəfindən təqdim olunub. Məlumatlara əsasən, bu nümunələr iddia edilən hadisə günü geyindiyi paltarından götürülüb. Aktrisanın sözlərinə görə, hadisə 18 may tarixində Parisdə yerləşən “Le Bristol” otelində baş verib. O iddia edir ki, Bessonla görüş zamanı çay içdikdən sonra huşunu itirib və daha sonra rejissor tərəfindən cinsi əlaqəyə məcbur edilib. Sonradan daha beş qadın da rejissoru oxşar ittihamlarla günahlandırıb. Onların arasında kino məktəbinin keçmiş tələbələri, modellər və keçmiş həmkarları da var.
Lük Besson isə irəli sürülən bütün ittihamları rədd edir. Məhkəmənin ərizə ilə bağlı qərarı iyunun 2-də gözlənilir.
