"Azadlıq və müstəqillik hər bir xalqın heç zaman köhnəlməyən arzu və istəkləridir. Azadlıq və müstəqillik ən ağır hərbi- siyasi şəraitlərdə belə heç bir şəkildə vaz keçilməyən milli ideallardır. Bu ideallar uğrunda tarix boyu bizim bildiyimiz və bilmədiyimiz saysız- hesabsız müharibələr baş verib və saysız- hesabsız qurbanlar verilib. Lakin heç də bütün xalqlar özlərinin azadlıq və müstəqillik ideallarını gerçəkləşdirə bilməyiblər”.
Bu fikirləri Milli Məclisin deputatı Cavanşir Feyziyev Ümummilli lider Heydər Əliyevin anadan olmasının 103-cü ildönümü münasibətilə Patrul.az-a danışarkən səsləndirib.
Vaxtilə əcdadlarımızın dünyanın ən möhtəşəm dövlətlərini yaratdığını və hətta onları imperiyalara çevirməyə nail olduqlarını xatırladan C.Feyziyev əlavə edib:
“Lakin on illər və hətta yüz illər boyunca öz qüdrəti ilə dünya xalqlarını heyrətləndirən bu səltənətlər fərqli tarixi şəraitlərdə tənəzzülə uğrayıb və bəziləri hətta öz varlığını hər hansı bir şəkildə də olsa qoruyub saxlamağa qadir olmayıblar.
Bu heç də mühakimə deyil, sadəcə tarixin gərdişini anlamaq üçün nəzər saldığımız və obyektiv dəyərləndirmək istədiyimiz tarixi həqiqətlərdir. Onu dərk etmədən bu günümüzün reallıqlarını və gələcəyimizin perspektivlərini düzgün dəyərləndirə bilmərik.
Zaman və siyasət insan bədəninin bir-biri ilə üzvi bağlılıqda olan hüceyrələri kimi daimi hərəkətdə olan fenomenlərdir. Siyasət tarixi zamanla sinxron hərəkət etmədikdə iflasa uğrayır. İflasa uğrayan siyasət isə idealları məhv edir, imperiyaları belə çökdürür, hətta xalqların və millətlərin yer üzündən silinməsinə qədər acı nəticələrə səbəb ola bilir. Tarix qocaldıqca siyasət daha da mürəkkəbləşir, keçmişin sadə qanunauyğunluqlar çərçivəsindən çıxaraq yeni heterogen xüsusiyyətlər əldə edir və beləliklə ortaya çıxan yeni amillər yeni siyasi qanunauyğunluqların daha mürəkkəb konfiqurasiyasını yaradır. Bu elə bir konfiqurasiyadır ki burada atılan heç bir addım əvvəlki addımlardan hər hansı birinin təkrarı deyil. Beləcə siyasət tarixlə birgə sinxron şəkildə addımlayır və xalqların taleyini formalaşdırır. Bütün bunları anlamadan və bu ideallar uğrunda mübarizə əzmi olan xalqa anlatmadan uğurlu siyasət aparmaq və milli azadlıq və müstəqillik ideallarını gerçəkləşdirmək mümkün deyil”.
Millət vəkili bildirib ki, ən qədim zamanlardan xalqımız azad yaşamağın təcrübəsini qazanıb və tarixin bütün dönəmlərində onu qoruyub saxlamağa çalışıblar:
“Lakin tarix səhvləri bağışlamayıb və qan bahasına əldə olunmuş azadlıq zaman- zaman itirilib və yenidən qazanılıb. Sonuncu dəfə bu günkü azadlığımızı əldə etmək üçün xalqımız iki əsrdən çox fasiləsiz olaraq mübarizə aparmalı olub. Bu gün dünya sistemində öz adı, yeri, dili, özünə məxsus ərazisi və beynəlxalq siyasətdə xüsusi çəkisi olan Azərbaycan Respublikası çox əsrlik müstəqillik ideallarımızın real həyatdakı təcəssümüdür. Respublikamızın tarix səhnəsinə ilk gəlişi 108 il əvvələ təsadüf etsə də real azadlığa və müstəqilliyə nail olmaq üçün daha bir əsr mübarizə aparmalı olmuşuq. Bu mübarizəni uğura qovuşduran və dövlət müstəqilliyimizin dönməzliyini, sarsılmazlığını və əbədiliyini təmin edən ən uğurlu siyasətçi isə Heydər Əliyev oldu. Dərin zəkası, həssas fəhmi və hər cür zəhmətə qatlaşmaq əzmi ilə hələ keçən əsrin ortalarında siyasət yoluna çıxmış Heydər Əliyev dövrün çağırışlarını və siyasi qanunauyğunluqlarını zərgər dəqiqliyi ilə düzgün dəyərləndirə bildi. O SSRİ- nin tarixində uzun bir siyasi yol qət etdi, XX əsrin qlobal siyasət arenasında çoxlarının həsəd apardığı bir şöhrət qazandı. O illərdə Heydər Əliyevin şəxsi karyera müstəvisində əldə etdiyi uğurlar bir sovet siyasətçisi üçün xoşbəxtliyin ən yüksək və hətta əlçatmaz həddi hesab oluna bilərdi. Düşünmək olardı ki, Heydər Əliyevə daha heç nə lazım deyil. O artıq bütün ömrünü Yer kürəsinin ən xoşbəxt adamlarından biri kimi yaşaya bilərdi. O isə belə düşünmürdü. O öz xoşbəxtliyini xalqın taleyindən kənarda görmürdü”.
Həmsöhbətimiz, Ulu Öndərin bütün ömrünü Azərbaycan xalqının taleyini dəyişmək amalı ilə yaşadığını vurğulayıb:
“Onun qarşısında hələ də çox ağır sınaqlardan keçməklə xalqın azadlığını və müstəqilliyini təmin etmək və daha sonra onu əbədi etmək üçün möhkəm əsaslar yaratmaq kimi çətin və şərəfli bir missiya vardı.
Bu missiyanı o hələ uzun illər əvvəl özü özünə seçmişdi. 1993- cü ildə Azərbaycan Respublikasının mövcudluğu belə sual altına düşdüyü ən ağır sınaq zamanında isə xalq da yekdilliklə bu missiyanı ona həvalə etdi. O həmin dövrdə “olum” və “ölüm” dilemması qarşısında dayanmış Azərbaycanı tarixin ən ağır sınaqlarının birindən şərəflə çıxardı. Onun müdrik siyasəti nəticəsində biz dövlət olaraq “ölmədik”, “olduq”.
SSRİ – ni idarə etmiş Siyasi Büro üzvləri arasında heç kimin siyasi dünyagörüşü hansısa bir dövlətin müstəqillik siyasətinin əsasına çevrilə bilmədi. Yalnız Heydər Əliyev siyasəti özündən sonra da müstəqil Azərbaycanın siyasi inkişaf kursuna çevrildi və öz məntiqi davamını əldə etdi. Məhz onun siyasi kursu bizi torpaqlarımızın işğaldan azad olunmasına gətirib çıxardı. Heydər Əliyevin siyasi kursu Azərbaycanın dünya miqyasında tanınmasına və beynəlxalq siyasətin vacib aktorlarından biri kimi qəbul olunmasına gətirib çıxardı”.
“Ona görə də Heydər Əliyev xalqımızın əsrlərlə davam edən milli azadlıq və müstəqillik mübarizəsində tarixi dönüş yaratmış nadir şəxsiyyətlərdən biridir və onun adı hər zaman müasir və müstəqil Azərbaycan dövlətinin qurucusu kimi böyük ehtiramla xatırlanır”,– deyə o fikirlərini yekunlaşdırıb.
Ləman Sərraf
