"Ev niyə bu qədər tez tozlanır?" deyə düşünürsünüzsə, bəlkə də toz alarkən bəzi xırda, amma vacib qaydaları nəzərdən qaçırırsınız.
Pravda.az işinizi asanlaşdıracaq praktik məlumatları təqdim edir:
Ardıcıllıq əsasdır (Yuxarıdan aşağıya qaydası)
Toz almağın ən vacib qaydası həmişə yuxarıdan aşağıya doğru təmizləməkdir. Üst rəflərdən və mebellərin yuxarı hissəsindən başlayan tozlar aşağı tökülür. Əgər əvvəlcə aşağıları təmizləsəniz, yuxarıdakı tozu alarkən aşağılar yenidən çirklənəcək. Bir səthi silərkən isə künclərdən başlayaraq dairəvi hərəkətlərlə mərkəzə doğru gəlmək, heç bir nöqtənin unudulmamasını təmin edir.
Material seçimində yaradıcı olun
Mikrofiber bez: Toz almaq üçün ən yaxşısı nəmli mikrofiber bezdir. Quru bez tozu sadəcə ətrafa yayır.
Diş fırçası: Mebellərin küncləri, oyma naxışları və əl çatmayan dar yerlər üçün yumşaq uclu diş fırçasından istifadə edə bilərsiniz.
Toz süpürgəsi: Bunlar jalüzlər və ya bitkilər kimi girintili-çıxıntılı sahələr üçün uyğundur.
Qulaq çöpü: Klaviatura kimi detallı təmizlik tələb edən yerlər üçün idealdır.
Toz alarkən suya nə əlavə edilməlidir?
Taxta mebellər: 1 litr suya yarım qapaq taxta təmizləyicisi (sabun əsaslı) əlavə edə bilərsiniz.
Sirkə xəbərdarlığı: Sirkə hər nə qədər təbii təmizləyici olsa da, bəzi taxta səthləri aşındıra bilər. Buna görə də xüsusi taxta təmizləyicilərinə üstünlük vermək daha təhlükəsizdir.
Elektronika: Televizor və kompüterlərin tozunu alarkən yalnız quru mikrofiber bez istifadə edin.
Divarları və tavanı unutmayın
Xüsusilə yayda pəncərələr açıq olanda divarlarda və tavanda çoxlu toz toplanır. Bu tozlar zamanla aşağı enərək evin daim tozlu görünməsinə səbəb olur. Tozsoranın uyğun başlığı ilə divarların, tavanın, pərdə rəflərinin (karnizlərin) və radiatorların tozunu almaq lazımdır.
Bitkilər də tozlanır!
İri yarpaqlı ev bitkiləri havanı təmizləsə də, yarpaqlarının üzərində toz yığılır. Yarpaqları nəm bezlə silmək həm bitkinin daha parlaq görünməsini təmin edir, həm də onun daha yaxşı "nəfəs almasına" kömək edir.
Toz nədən yaranır və niyə təhlükəlidir?
Toz sadəcə çirk deyil; o, geyim lifləri, insan dərisi hüceyrələri, polenlər və kimyəvi hissəciklərin qarışığıdır. Tozla uzun müddət təmasda olmaq allergiyaya, tənəffüs yolları problemlərinə və hətta daha ciddi sağlamlıq problemlərinə yol aça bilər. Buna görə də müntəzəm toz almaq sağlamlıq üçün vacibdir.
Əminə Bayramova
