Yeni araşdırma sosial şəbəkələrə münasibəti fərqli aspektdən qiymətləndirməyi təklif edir.
Bizim.Media xəbər verir ki, nəticələri “International Journal of Electronic Marketing and Retailing” jurnalında dərc olunan araşdırmaya görə, insanlar sosial şəbəkələrdən təkcə vərdiş və ya “asılılıq” səbəbindən istifadə etmirlər.
Tədqiqat müəllifləri bildirirlər ki, sosial şəbəkələr çox vaxt emosiyaları idarə etmək və sosial əlaqələri qorumaq vasitəsi kimi çıxış edir. Araşdırma “istifadə və məmnuniyyət” nəzəriyyəsinə əsaslanır.
Bu yanaşmaya görə, istifadəçi kontentin passiv istehlakçısı deyil, öz psixoloji ehtiyaclarına uyğun platforma seçən aktiv iştirakçıdır.
Tədqiqatçılar sosial şəbəkələrdən istifadənin dörd əsas motivini müəyyən ediblər:
stress, narahatlıq və pis əhvalın öhdəsindən gəlmək;
ünsiyyət, aidiyyət və başqaları ilə əlaqə ehtiyacı;
zövq almaq və özünəinamı artırmaq;
ətraf mühitin təsiri və trendlərə uyğunlaşmaq.
Araşdırmanın əsas nəticəsinə görə, insanların sosial şəbəkələrdə keçirdiyi vaxta ən çox təsir edən amillər stress və ünsiyyət ehtiyacıdır. Başqa sözlə, insanlar sosial şəbəkələrdə çox vaxt ona görə “ilişib qalmırlar” ki, dayana bilmirlər. Onlar ya sakitləşməyə, ya da başqaları ilə əlaqə hissini qorumağa çalışırlar.
Tədqiqatda qeyd olunur ki, zövq amili də rol oynayır, lakin onun təsiri daha az sabitdir. Trendlərin və “bəyənmə” təzyiqinin təsiri isə gözləniləndən zəif olub.
Müəlliflər hesab edirlər ki, ekran vaxtını sadəcə məhdudlaşdırmaq problemi həmişə həll etmir, bəzi hallarda isə vəziyyəti daha da çətinləşdirə bilər.
Əgər sosial şəbəkələr insan üçün emosional tənzimləmə və sosial əlaqə vasitəsidirsə, alternativ dəstək mexanizmləri olmadan onlardan kəskin imtina həmin şəxsi bu dəstəkdən məhrum edə bilər.
Bizim.Media
