ain.az, Avtosfer saytına istinadən bildirir.
Avtomobil sənayesində geri çağırışların sayının artdığı bir dövrdə aparılan geniş araşdırma ən etibarlı və ən çox problem yaşayan markaları üzə çıxarıb.
Avtosfer.az xəbər verir ki, nəticələrə görə, Almaniyanın avtomobil nəhəngi “Mercedes-Benz” siyahıya liderlik edir, ABŞ istehsalçısı “Ford” isə ən çox geri çağırışla diqqət çəkir.
Məlumata görə, istehlakçıların avtomobil seçimində etibarlılığa daha çox önəm verdiyi bir vaxtda “iSeeCars” platformasının hazırladığı hesabat xüsusi əhəmiyyət daşıyır. ABŞ Milli Yol Hərəkəti Təhlükəsizliyi Administrasiyasının (NHTSA) məlumatlarına əsaslanan araşdırmada 2017–2025-ci illər arasında avtomobillərin performansı təhlil edilib və nəqliyyat vasitələrinin 30 illik istismar müddətində yarana biləcək potensial problemlər qiymətləndirilib.
Tədqiqatın nəticələrinə əsasən, “Mercedes-Benz” ən az problem yaşama ehtimalı olan marka kimi önə çıxıb. Alman istehsalçısı ən az geri çağırışa məruz qalan ilk 10 modeldən 9-da təmsil olunaraq diqqətəlayiq nəticə göstərib. Siyahıda “Mercedes G-Class” birinci yerdə qərarlaşıb. Bundan əlavə, “SL-Class”, “E-Class”, “CLA” və “GLC” modelləri ilk 20-likdə geniş şəkildə yer alıb.
Reytinqdə digər markalara məxsus modellər də yer alıb. Bunlar arasında “MINI Convertible”, “Chevrolet Suburban”, “Subaru Crosstrek”, “Mazda MX-5 Miata RF” və “Lexus ES 250” kimi avtomobillər qeyd olunub.
Hesabatın ikinci hissəsində isə 2025-ci ilin aprelindən 2026-cı ilin mart ayına qədər olan 12 aylıq dövr əvvəlki illə müqayisə edilib. Bu müddət ərzində sənaye üzrə geri çağırışların sayı üç dəfə artıb. Mənfi statistikanın mərkəzində isə “Ford” dayanıb. Şirkət təkcə 2026-cı ilin martına qədər olan dövrdə 19 fərqli geri çağırış həyata keçirib və ümumilikdə son bir ildə təxminən 20 milyon avtomobili geri çağırıb. Araşdırma göstərir ki, “Ford” təkbaşına bəzi hallarda bütün sənayenin ümumi göstəricilərini belə üstələyib.
Eyni dövrdə “Mercedes-Benz” 122 min 331 avtomobili geri çağırıb. Bununla yanaşı, “Toyota”, “Chrysler” və “Hyundai” kimi digər iri istehsalçılar da geri çağırış sayına görə siyahıda yer alıblar.
Təhlillər həmçinin göstərib ki, ən çox problem riski daşıyan 25 avtomobildən 12-si “Ford” modelləridir. Siyahıda ən riskli nəqliyyat vasitəsi isə şirkətin lüks brendi olan “Lincoln”a məxsus “Aviator” modeli kimi göstərilib.
Ekspertlərin fikrincə, bu nəticələr avtomobil bazarında etibarlılığın hələ də əsas seçim meyarlarından biri olduğunu bir daha təsdiqləyir və istehsalçıların keyfiyyətə daha çox diqqət ayırmasının vacibliyini ortaya qoyur.
Eltac Zülfüqaroğlu
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
