Qızılın qiyməti beşhəftəlik minimum səviyyədən sonra artıb.
AZƏRTAC xəbər verir ki, bu gün qızılın bir troya unsiyasının qiyməti 20,5 dollar artaraq 4 553,8 dollar təşkil edib. Bundan əvvəlki gün isə qızılın qiymətində 2 faizdən çox azalma qeydə alınmışdı. ABŞ-də iyun ayı üzrə qızıl fyuçersləri isə 0,5 faiz artaraq 4 554,1 dollara yüksəlib.
Ekspertlər qeyd edib ki, ABŞ dollarının möhkəmlənməsi və xam neft qiymətlərindəki artım inflyasiya gözləntilərini yüksəldərək qızılın bahalaşmasına mane olur.
“Brent” markalı xam neftin qiyməti bir barel üçün 110 dollardan yuxarı səviyyədə qalıb. Bu fonda ABŞ və İran Hörmüz boğazında təhlükəsizliklə bağlı qarşılıqlı hərbi addımlar atmaqla yanaşı, eyni zamanda, gərginliyin azaldılması istiqamətində danışıqları davam etdirirlər.
Eyni zamanda, xam neft qiymətlərinin yüksək olması inflyasiyanı artıraraq faiz dərəcələrinin artma ehtimalını gücləndirir. Qızıl inflyasiyaya qarşı qoruyucu aktiv hesab olunsa da, yüksək faiz dərəcələri gəlir gətirən aktivləri daha cəlbedici edir və bu da qızılın cəlbediciliyini azaldır.
İnvestorlar bu həftə açıqlanacaq mühüm ABŞ iqtisadi göstəricilərini, o cümlədən aprel ayı üzrə əmək bazarı göstəricilərini gözləyirlər.
Həmçinin digər qiymətli metallar da bahalaşıb. Gümüşün qiyməti 0,8 faiz artaraq unsiya üçün 73,29 dollar, platinin qiyməti 1,7 faiz artaraq 1 978,77 dollar, palladiumun qiyməti isə 1,1 faiz artaraq 1 496,25 dollar təşkil edib.
