Hörmuz boğazındakı məhdudiyyətlər qlobal enerji bazarında balansı dəyişib...
Poliqon xəbər verir ki, Bloomberg nəşrinin məlumatına görə, ABŞ son həftələrdə neft ixracını kəskin artıraraq Səudiyyə Ərəbistanını geridə qoyub və dünyanın ən böyük neft ixracatçısına çevrilib.
Məlumata əsasən, son doqquz həftə ərzində ABŞ-dən 250 milyon bareldən çox neft ixrac edilib. Bu artım əsasən Ormuz boğazında yaranmış məhdudiyyətlər və Fars körfəzi ölkələrindən neft tədarükünün çətinləşməsi fonunda baş verib. Regionda nəqliyyatın pozulması qlobal bazarda boşluq yaradıb və ABŞ bu boşluğu sürətlə doldurmağa çalışıb.
Bununla yanaşı, ekspertlər bildirirlər ki, ABŞ istehsalı artırmaqda çətinliklərlə üzləşir. Belə ki, ölkədə neft və yanacaq ehtiyatları ardıcıl olaraq dörd həftədir azalır və artıq tarixi orta göstəricilərdən aşağı səviyyəyə enib. Bu isə uzunmüddətli perspektivdə ixracın davamlılığı ilə bağlı suallar yaradır.
Analitiklərin fikrincə, mövcud vəziyyət ABŞ-nin qlobal enerji bazarında rolunun daha da gücləndiyini göstərir. Vaşinqton həm istehsal, həm də ixrac imkanları sayəsində ənənəvi enerji güclərinin yerini qismən doldura bilir.
Eyni zamanda qeyd olunur ki, Orta Şərqdəki geosiyasi gərginlik və logistika problemləri davam edərsə, ABŞ-nin bu mövqeyini qoruyub saxlaması ehtimalı yüksəkdir. Bununla belə, daxili ehtiyatların azalması və hasilatın məhdud imkanları gələcəkdə yeni çağırışlar yarada bilər.
Poliqon.info
