1945-ci il avqustun 6-da ABŞ-ın B-29 Superfortress tipli "Enola Gay" bombardmançı təyyarəsi Yaponiyanın Xuroşima şəhərinə "Little Boy" adlı atom bombasını atdı və bu hadisə dünya tarixində dönüş nöqtəsinə çevrildi. Təyyarə bombanı təxminən 9,4 km hündürlükdən buraxdı və bununla da nüvə erası başladı.
Turkustan.az xəbər verir ki, bu barədə "Wionews" yazır.
Ən bahalı hərbi layihələrdən biri
B-29 proqramının yaradılması ABŞ-a həmin dövrün qiymətləri ilə təxminən 3 milyard dollara başa gəlib. Bu məbləğ müasir dəyərlə 50–60 milyard dollardan çox təşkil edir. Müqayisə üçün, "Manhattan Project" çərçivəsində atom bombasının hazırlanması təxminən 1,9 milyard dollara (müasir ekvivalentdə 30–35 milyard dollar) başa gəlib
Adi bombardmançılar nüvə silahı daşıya bilmədiyi üçün B-29 təyyarəsi "Silverplate" adlı gizli proqram çərçivəsində ciddi şəkildə yenidən qurulmuşdu. Çəkinin azaldılması və təxminən 4,4 tonluq bombanın yerləşdirilməsi üçün təyyarədən zireh və bəzi silahlar çıxarılmışdı.
"Enola Gay" adının mənşəyi
Təyyarənin pilotu polkovnik Pol Tibets idi. O, missiya ərəfəsində bombardmançını anasının şərəfinə "Enola Gay" adlandırmışdı. Uçuş Sakit okeandakı Tinian adasından həyata keçirilmişdi, burada ABŞ-ın hərbi bazası yerləşirdi.
Təyyarənin göyərtəsində partlayış gücü təxminən 15 kiloton trotil ekvivalentinə bərabər olan "Little Boy" uran bombası var idi. Adına baxmayaraq, bu, öz dövrünün ən mürəkkəb və təhlükəli layihələrindən biri idi.
Partlayışa 43 saniyə
Bomba saat 08:15-də təxminən 9,4 km hündürlükdən atıldı. O, partlayışdan əvvəl 43 saniyə ərzində düşərək şəhər üzərində təxminən 580 metr yüksəklikdə partladı.
Xilas manevri
Bomba atıldıqdan dərhal sonra pilot zərbə dalğasından yayınmaq üçün təxminən 155 dərəcəlik kəskin dönüş etdi. Təyyarə episentrdən təxminən 18,5 km məsafədə olarkən partlayışın təsiri ilə iki dəfə güclü silkələndi.
Partlayış nəticəsində şəhərin təxminən 13 km² ərazisi dərhal məhv edilib. Müxtəlif qiymətləndirmələrə görə, hücumun ilk saatlarında 70–80 min insan həlak olub.
"Enola Gay" bazaya qayıdaraq nüvə dövrünün başlanğıcının simvoluna və XX əsrin ən mübahisəli missiyalarından birinə çevrildi./Qaynarinfo/
