Çin tədqiqatçıları yağışın kinetik enerjisini elektrik cərəyanına çevirən innovativ qurğu hazırlayıblar. Yeni texnologiya günəş işığı tam olmadıqda belə onlarla LED lampanı və sensoru işlədə bilir.
Ölkə.az xəbər verir ki, bu barədə "EcoNews" nəşri məlumat yayıb.
Qurğu W-DEG (suya inteqrasiya olunmuş damcı enerjisi generatoru) adlandırılıb. Sistem suyun səthində üzən ultra nazik plyonkadan ibarətdir. Hər bir yağış damcısının səthə düşməsi qısa elektrik impulsu yaradır.
Sınaqlar zamanı sahəsi cəmi 0,3 kvadratmetr olan prototip eyni vaxtda 50 kommersiya LED lampanı qidalandıra bilib. Məlumata görə, qurğu sudan yalnız dayaq kimi deyil, həm də elektrik dövrəsinin bir hissəsi kimi istifadə edir ki, bu da konstruksiyanın həm qiymətini, həm də çəkisini əhəmiyyətli dərəcədə azaldır.
Nankin Aeronavtika və Astronavtika Universitetinin tədqiqatçıları bildirirlər ki, yeni sistem ənənəvi analoqlardan 87% daha yüngüldür. Alimlərin fikrincə, bu xüsusiyyət onu göllər və su anbarları üçün ideal edir.
Professor Vanlin Qo qeyd edib: "Suyun həm struktur, həm də elektrik rolu oynamasına imkan verərək, biz damcılar vasitəsilə enerji istehsalında yeni strategiyanın yolunu açdıq”.
Bildirilir ki, belə panelin qiyməti hər kvadrat fut üçün təxminən 14 dollar təşkil edir ki, bu da əvvəlki texnologiyalarla müqayisədə demək olar iki dəfə ucuzdur. Bu isə əvvəllər tez-tez batareya dəyişdirilməsinə ehtiyac duyan su keyfiyyəti sensorları üçün texnologiyanın tətbiqini mümkün edir.
250 volta qədər pik gərginliyə baxmayaraq, tədqiqatçılar vurğulayırlar ki, bu texnologiya günəş və ya külək enerjisini əvəz etməyəcək. Nəşrdə qeyd olunur ki, bu, uzunmüddətli buludlu hava şəraitində enerji təminatındakı boşluqları dolduran "yüngül əlavə sistem”dir.
Qurğu çirkli göl suyunda və 10°C-dən 50°C-yə qədər temperatur aralığında işlək qalır. Bununla belə, kütləvi istehsala keçid üçün tərtibatçılar artıq suyun səthdə toplanaraq enerji istehsalının səmərəliliyini azaltmaması üçün drenaj sistemini təkmilləşdirməlidirlər.(qaynarinfo)
