400 milyon dollarlıq vəsaitin istifadə olunmadığı bildirilib, senatorlar cavabsız qalan sorğulardan narazılıq ifadə edib...
Poliqon xəbər verir ki, ABŞ-də respublikaçı senator Mitç MakKonnell ABŞ Müdafiə Nazirliyini Ukraynaya ayrılmış hərbi yardımın gecikdirilməsində ittiham edib. Onun sözlərinə görə, söhbət ümumilikdə 400 milyon dollar həcmində vəsaitdən gedir.
Bildirilib ki, qeyd olunan maliyyə vəsaiti 2025-ci ilin dekabrında ABŞ Konqresi tərəfindən təsdiqlənib və ABŞ-nin təhlükəsizlik yardımı təşəbbüsü çərçivəsində nəzərdə tutulub. Bu proqram vasitəsilə Müdafiə Nazirliyi ABŞ şirkətlərindən silah və hərbi texnika alaraq onları Ukraynaya ötürür.
Mitç MakKonnell iddia edib ki, ayrılmış vəsait hazırda istifadə olunmur və faktiki olaraq nazirliyin daxilində saxlanılır. O, həmçinin senatorların məsələ ilə bağlı nazirliyin analitik bölməsinə sorğu ünvanladıqlarını, lakin bu müraciətlərə cavab verilmədiyini bildirib.
Məlumata görə, həmin analitik bölməyə ABŞ müdafiə nazirinin müavini Elbric Kolbi rəhbərlik edir. Qeyd olunur ki, Kolbi daha əvvəl Ukraynaya və ABŞ müttəfiqlərinə ayrılan xərcləri tənqid edən mövqe ilə çıxış edib.
Buna baxmayaraq, ABŞ Konqresi yekun müdafiə büdcəsində Ukraynaya yardım üçün maliyyələşdirməni saxlayıb. Mövcud vəziyyətlə bağlı ABŞ Müdafiə Nazirliyi tərəfindən hələlik rəsmi açıqlama verilməyib.
Analitiklər hesab edirlər ki, bu məsələ ABŞ daxilində Ukraynaya dəstək siyasəti ətrafında fikir ayrılıqlarının davam etdiyini göstərir və gələcəkdə yardım mexanizmlərinin icrasına təsir göstərə bilər.
Poliqon.info
