"Rusiya İranın əsas tərəfdaşlarından biri kimi çıxış edir və bu səbəbdən rəsmi Tehran son dövrlərdə Kreml ilə birbaşa siyasi-diplomatik təmasları intensivləşdirməyə çalışır. Yaxın Şərqdə Rusiyanın öz strateji maraqları mövcuddur və Moskva hesab edir ki, İranın regiondakı mövqelərinin güclənməsi bu maraqlar baxımından vacibdir. Bu kontekstdə Rusiya İrana dəstək verən əsas aktorlar sırasında yer alır və nəticə etibarilə Yaxın Şərq böhranı fonunda ABŞ və Qərblə maraq toqquşması qaçılmaz xarakter alır. Pakistanın vasitəçilik rolu isə tədricən arxa plana keçir. Bunun əsas səbəblərindən biri İslamabadın ABŞ-la münasibətlərdə müəyyən məsafə saxlamağa çalışması, eyni zamanda Çinlə strateji tərəfdaşlığını qorumasıdır. ABŞ-nin isə vasitəçi formatını dəyişmək istiqamətində addımlar atdığı müşahidə olunur. Bu vəziyyət müəyyən mənada İran üçün narahatlıq doğurur".
Bu fikirləri Aznews.az-a açıqlamasında siyasi şərhçi Elçin Xalidbəyli deyib.
Qeyd edək, İranın Qahirədəki səfiri Müctəba Firdovsi Pur qeyd edib ki, Tehran Rusiyanın İran və ABŞ arasında mümkün razılaşmanın icrasında təminatçı rol oynaya biləcəyini istisna etmir. Diplomatın sözlərinə görə, İran Moskva ilə birgə şəkildə müharibənin dayandırılması istiqamətində fəaliyyətini davam etdirir.
Siyasi şərhçi bildirib ki, Pakistanın vasitəçiliyi Tehran üçün məqbul idi və Çin faktoru bu modeli İran baxımından daha balanslı edirdi.
