Kaliforniyanın Qotorun şəhərində yerləşən "ThinKom Solutions" şirkəti 2025-ci ilin avqustunda yüksək güclü mikrodalğa əsaslı yönləndirilmiş enerji silahları bazarına daxil olduğunu elan edib...
Poliqon xəbər verir ki, bu barədə Defence Blog yazır.
Nəşrin məlumatına görə, ABŞ ordusunun "Cross Domain Fires Concept Focused Warfighting Experiment" adlı son sınağı zamanı şirkətin mobil HPM sistemi pikap avtomobilinə quraşdırılıb. "Echodyne" şirkətinin "EchoShield" radarı ilə idarə olunan sistem, heç bir güllə atmadan dronun elektronikasını sıradan çıxarmağa hazır olub.
Şirkət pilotsuz uçuş aparatlarına (PUA), inteqrasiya olunmuş hava və raket əleyhinə müdafiəyə və elektron mübarizə sistemlərinə qarşı texnologiyalar hazırlayır.
Məqalədə qeyd olunur ki, bu addım şirkət üçün kəskin istiqamət dəyişimi deyil, mövcud texnologiyanın genişləndirilməsidir. "ThinKom" iki onillikdən artıq müddətdə peyk rabitəsi üçün fazalı anten massivləri hazırlayıb və onların əsasında VICTS adlı patentləşdirilmiş texnologiya inkişaf etdirib. Bu texnologiyanın HPM silahlarında tələb olunan yüksək gücə uyğun olduğu müəyyən edilib.
Şirkət artıq VICTS antenalarının sınaqlar zamanı giqavat səviyyəli gücə tab gətirə bildiyini nümayiş etdirib. Sistemin hərbi yaşıl rəngdə olan HPM versiyası açıq sahədə standart pikap üzərinə quraşdırılıb.
"Qoşqu yoxdur. Konteyner ölçülü generator yoxdur. Xüsusi şassi və ya ağır texnika tələb olunmur. Sadəcə pikap, sistem və hərəkət imkanı", deyə nəşr yazır.
Defence Blog-un izahına görə, bu mobil həll "ThinKom"un əsas üstünlüyü kimi təqdim olunur.
VICTS (Variable Inclination Continuous Transverse Stub) mexaniki idarə olunan fazalı antenna sistemi olub, adi elektron fazalanmış antenalardan fərqli olaraq mexaniki şəkildə yönləndirilir və bu da ona daha yüksək güc səviyyələrinə tab gətirməyə imkan verir.
Yüksək güclü mikrodalğa silahı dron üzərinə yönləndirilmiş elektromaqnit impuls vasitəsilə onun elektron sistemlərini – uçuş nəzarəti, GPS və mühərrik idarəetmə modullarını sıradan çıxarır.
Nəşrin qeyd etdiyi kimi, bu təsir "sərt məhv etmə" adlandırılır və hədəfdəki elektronikanı ani və geri dönməz şəkildə zədələyir.
Sistem dronların rabitəni itirdikdə ya dayanmasına, ya geri dönməsinə, ya da proqramlaşdırılmış missiyanı davam etdirməsinə səbəb ola bilər. Lakin yüksək güclü impuls elektronikanı sıradan çıxardıqda dron tam işləkliyini itirir.
Şirkət sistemin 360 dərəcə əhatə imkanına və hərəkət zamanı işləməsinə xüsusi diqqət çəkir, çünki bu, stasionar HPM sistemlərinin çatışmazlıqlarını aradan qaldırır.
Məqalədə həmçinin qeyd olunur ki, ölçü, çəki və enerji balansı (SWaP) bu cür sistemlər üçün kritik əhəmiyyət daşıyır. Hər əlavə kiloqram və enerji sərfi digər sistemlərin imkanlarını azaldır.
Şirkət bu həllin həm mobil, həm də stasionar missiyalar üçün uyğun olduğunu bildirir.
Poliqon.info
