İranın Hüquq-Mühafizə Qüvvələrinin baş komandanı general Əhmədrza Radan düşmən qüvvələrin onun yerdəyişmələrini izləmək cəhdlərinin uğursuzluğa düçar olduğunu bəyan edib.
Musavat.com xəbər verir ki, yüksək rütbəli hərbçi öz təhlükəsizliyini təmin etmək üçün stasionar obyektlərdən imtina etdiyini və nəqliyyat vasitələrini müvəqqəti qərargah kimi istifadə etdiyini bildirib. Radanın sözlərinə görə, düşmən qüvvələri onun yerini müəyyənləşdirmək üçün "çox əziyyət çəksələr də", buna nail ola bilməyiblər.
General qeyd edib ki, rəhbərlik etdiyi qurumun hər bir nəqliyyat vasitəsi "möhkəmləndirilmiş məntəqəyə" çevrilib və bu, ona çevik hərəkət etmək imkanı verir. Son gecələrini daim hərəkətdə keçirdiyini vurğulayan Radan, "ya maşında, ya da küçədə" olduğunu, hədəfə çevrilməmək üçün heç bir sabit binada qalmadığını xüsusi diqqətə çatdırıb.
Bu açıqlama İran rəhbərliyində, xüsusilə İsrailin nöqtə zərbələrindən sonra yaranan yüksək gərginliyin və ciddi təhlükəsizlik tədbirlərinin növbəti nümunəsi kimi qiymətləndirilir. Analitiklər generalın bu çıxışını həm düşmənə psixoloji təzyiq, həm də daxili auditoriyaya "vəziyyətə nəzarət edirik" mesajı kimi şərh edirlər.
Musavat.com
