ABŞ Silahlı Qüvvələrinin Mərkəzi Komandanlığı — CENTCOM — İranın Touska adlı ticarət gəmisinin ələ keçirilməsi anlarını əks etdirən videogörüntüləri paylaşıb. Kadrlarda ABŞ dəniz piyadalarının USS Tripoli desant gəmisindən əməliyyat həyata keçirdiyi görünür.
“İki sahil” xəbər verir ki, görüntülər X sosial şəbəkə hesabında yayılıb.
ABŞ tərəfinin versiyasına görə, Touska gəmisi altı saat ərzində Amerika qüvvələrinin dəfələrlə etdiyi xəbərdarlıqlara məhəl qoymayıb. Videodan görünür ki, dəniz piyadaları helikopter vasitəsilə gəminin üzərinə endirilərək kəndirlərlə aşağı düşüblər.
19 aprel tarixində İran bayrağı altında üzən Touska quru yük gəmisi Vaşinqtonun tətbiq etdiyi dəniz blokadasını yarmağa cəhd edib. USS Spruance esminesi gəmini Hörmüz boğazı istiqamətində — Bəndər-Abbas limanına doğru hərəkət edərkən saxlayıb.
The Washington Post nəşrinin məlumatına görə, gəmi Çindən İrana doğru yolda olub. İran hakimiyyəti isə bu addımı atəşkəsin pozulması kimi qiymətləndirib və cavab olaraq ABŞ-ın bir neçə hərbi gəmisinə pilotsuz uçuş aparatları ilə hücum edib.
Hadisə regionda onsuz da yüksək olan gərginliyi daha da artırıb və tərəflər arasında qarşıdurmanın genişlənə biləcəyi ilə bağlı narahatlıqları gücləndirib.
