ain.az, Medicina portalına istinadən məlumat yayır.
Araşdırmalar göstərir ki, portağalın özü şirəsindən daha təsirlidir. Düzgün miqdarda istehlak edildikdə, portağal ürək və beyin sağlamlığı üçün müalicə xəzinəsidir.
Medicina.az xəbər verir ki, türkiyəli kardioloq Dr. Dosent Erhan Gönen portağalların tərkibindəki antioksidan maddələrin damar sağlamlığının qorunmasında mühüm rol oynaya biləcəyini bildirib:
"İnsan bir oturuşda asanlıqla 3-4 portağal yeyə bilməz. Lakin, meyvə suyu hazırlayarkən adətən 3-4 portağal istifadə olunur və bu, tez bir zamanda istehlak edildikdə qan şəkərinin daha sürətli artmasına səbəb ola bilər. Həmçinin, meyvənin sellülozundakı lif meyvə suyunun hazırlanması zamanı əsasən itirilir. Buna görə də, mümkün olduqda meyvənin özünü istehlak etmək daha sağlamdır.
Ev şəraitində hazırlanmış portağal suyu, tərkibində qatqılar olan hazır meyvə şirələrinə daha sağlam alternativdir. Həmçinin, həftədə bir neçə gün təxminən 300 millilitr təzə sıxılmış portağal suyu istehlakı ürək və beyin sağlamlığına müsbət töhfələr verə bilər".
Dr. Gönen portağalların tərkibindəki flavonoidlərin və antioksidantların damar sağlamlığı üçün vacib olduğunu bildirib:
"Bu maddələr bədəndəki iltihabi proseslərin qarşısını almağa kömək edə bilər. Bu antioksidantlar qan damar divarlarında iltihabı azalda bilər və beləliklə, infarkt riskini azaltmağa kömək edir. Beyin qan damarlarına təsirləri sayəsində insult, Alzheimer və Parkinson kimi xəstəliklərin inkişafına da müsbət təsir göstərə bilərlər."
Dr. Gönen həmçinin portağalların lif tərkibi sayəsində bağırsaq sağlamlığına müsbət təsir göstərdiyini qeyd edərək, sağlam bağırsaq florasının bədəndə vitamin və antioksidantların mənimsənilməsinə birbaşa təsir etdiyini deyib:
"Bağırsaq sağlamlığı zəif olduqda, C vitamini, B vitamini və flavonoidlər kimi faydalı maddələrin mənimsənilməsi də azala bilər. Buna görə də, liflə zəngin meyvələr bağırsaq mikrobiotasını dəstəkləyə və ümumi sağlamlığa töhfə verə bilər".
Aygün
Medicina.az
Hadisənin gedişatını izləmək üçün ain.az saytında ən son yeniliklərə baxın.
