Avropa Komissiyası Ukraynaya 90 milyard avro həcmində ödənişlərin başlanmasını 2026-cı ilin ikinci yarısına qədər təxirə salıb. Bu barədə brifinqdə AK-nin nümayəndəsi Bala Uyvari bildirib.
“Avropa Komissiyası bu proqram çərçivəsində ilk ödənişləri 2026-cı ilin ikinci yarısında həyata keçirmək planına sadiq qalır”, — deyə o qeyd edib.
Martın 31-də Aİ-nin xarici siyasət rəhbəri Kaya Kallas maliyyələşdirmənin razılaşdırılması üzrə irəliləyişin olmadığını bildirərək, mövcud maneələrin qalmaqda davam etdiyini vurğulamışdı. Ukraynanın xarici işlər naziri Andrey Sibiqa isə əsas maneə kimi Budapeştin mövqeyini açıq şəkildə göstərmişdi.
Aprelin 13-də Macarıstanda keçirilən parlament seçkilərindən sonra qalib gələn “Tisa” partiyasının lideri Peter Madjar bildirib ki, ölkə çətin iqtisadi vəziyyətə görə 90 milyard avroluq kreditin verilməsində özü iştirak etməyəcək. Bununla yanaşı, o qeyd edib ki, Ukraynanın Aİ-dən vəsait almasına mane olmayacaq — bu proses əvvəlki lider Viktor Orban tərəfindən bloklanmışdı.
Madjar həmçinin Ukraynanın Aİ-yə sürətləndirilmiş şəkildə qəbulunu dəstəkləmədiyini bildirib. Onun fikrincə, Kiyev digər namizədlər kimi standart üzvlük prosedurundan keçməlidir.
