Planlı transformasiya ilə Azərbaycan iqtisadiyyatı 2035-ci ilə qədər 150 milyard dollara qədər arta bilər.
“APA-Economics” xəbər verir ki, bu barədə beynəlxalq konsaltinq şirkəti “OliverWyman Group”un hesabatında bildirilib.
Qeyd edilib ki, aparılan təhlilə əsasən, Azərbaycan iqtisadiyyatı kritik dönüş nöqtəsindədir və mövcud resurslar, strateji mövqe və struktur islahatlar sayəsində növbəti onillikdə ÜDM-i iki dəfə artırmaq imkanına malikdir.
Hesabatda qeyd olunur ki, 2035-ci ilə qədər 150 milyard dollarlıq iqtisadiyyata çatmaq təsadüfi deyil, bu, mövcud üstünlüklərə əsaslanan planlı və strukturlaşdırılmış transformasiya nəticəsində mümkündür.
Sənədə görə, bu məqsədə nail olmaq üçün Azərbaycan xammal əsaslı modeldən xidmətlərə və yüksək əlavə dəyər yaradan aşağı axın neft-kimya məhsullarına keçid etməlidir. Bu yanaşma ölkəyə daha dinamik və şaxələndirilmiş iqtisadi model qurmağa imkan verəcək.
Hesabat müəllifləri Azərbaycanın yüksək gəlirli ölkələr qrupuna daxil olmaq potensialının olduğunu vurğulayır. Bildirilir ki, düzgün strategiyalar tətbiq olunarsa, ölkə adambaşına ÜDM-in 23–32 min dollar olduğu Çexiya, Portuqaliya və Macarıstan kimi iqtisadiyyatlara yaxınlaşa bilər.
Araşdırmada iqtisadi transformasiya üçün dörd əsas istiqamət müəyyən edilib: aşağı axın neft-kimya sənayesi, enerji ticarəti xidmətləri, logistika xidmətlərinin inkişafı və təcrübə əsaslı turizm modeli. Bu istiqamətlərin birlikdə tətbiqi ölkədə uzunmüddətli artım, gəlirlilik və rəqabət qabiliyyətini artıran vahid iqtisadi model formalaşdırır.
Sənəddə qeyd edilir ki, Azərbaycanın coğrafi mövqeyi ölkəni regional enerji və logistika mərkəzinə çevirmək potensialına malikdir. Bu isə hazırda xaricdə formalaşan maliyyə və xidmət dəyərinin ölkə daxilində yaradılmasına imkan verə bilər.
Eyni zamanda, turizm sektorunun inkişafı xüsusi vurğulanır. 2024-cü ildə ölkəyə 2,6 milyon turist gəldiyi və təxminən 2 milyard dollar gəlir əldə olunduğu bildirilsə də, bu göstəricinin potensialdan xeyli aşağı olduğu qeyd edilir. Hesabata görə, 2035-ci ilə qədər turist sayını 10–12 milyona çatdırmaq mümkündür.
“OliverWyman" təhlilçilərinə görə, Azərbaycan yalnız resurs ixrac edən ölkə deyil, ideya, xidmət və maliyyə axınları yaradan regional “bazar qurucu” roluna keçə bilər.
“OliverWyman Group” 1984-cü ildə Nyu-Yorkda əsası qoyulan və Avropa, Şimali Amerika, Yaxın Şərq və Asiya Sakit Okean regionunda 60-dan çox ofisi, 5000-dən çox mütəxəssisi olan dünyanın ən yaxşı konsaltinq şirkətləri sırasında yer alır.
