Nəsimi Rayon Məhkəməsində qəsdən sağlamlığa yüngül zərər vurmada təqsirləndirilən Naqif Rəcəbovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Elməddin Hüseynovun sədrliyi ilə keçirilən prosesdə hökm oxunub.
Məhkəmənin hökmü ilə icraata xitam verilib və o, cinayət məsuliyyətindən azad edilib.
İttihama görə, hadisə bu il paytaxtın Nəsimi rayonu ərazisində yerləşən bərbərxanaların birində baş verib.
Belə ki, Naqif Rəcəbov sevgili münasibətində olduğu zərərçəkmiş Elnarə İsmiyevlə (adı, soyadı şərtidir) aralarında şəxsi münasibətlərin pozulması zəminində yaranmış mübahisə zamanı sonuncuya qarşı fiziki zor tətbiq edib.
İstintaq materiallarına əsasən, təqsirləndirilən şəxs mübahisə zamanı qəsdən zərərçəkmiş şəxsin baş nahiyəsinə əl zərbələri endirib. Nəticədə Elnarə sağ gicgah, sağ qulaqaltı-çeynəmə və ağ almacıq nahiyələrində iri ölçülü dərialtı hematomalar, eləcə də sol yanaq nahiyəsində qançır xəsarətləri alıb. Həmin xəsarətlər gicgah-çənə oynağında hərəkət funksiyasının ağrı və şişkinlik səbəbindən məhdudlaşması ilə müşayiət olunub.
Məhkəmə iclasında Naqif Rəcəbov ona elan olunmuş ittiham üzrə özünü təqsirli bildiyini təsdiqləyib. O, ifadəsində törətdiyi əməldən səmimi peşman olduğunu, zərərçəkmiş şəxslə barışdığını və baş vermiş hadisəyə görə təəssüf hissi keçirdiyini deyib.
Təqsirləndirilən şəxs həmçinin qeyd edib ki, tərəflər arasında artıq barışıq əldə olunub, Elnarəyə dəymiş ziyan tam şəkildə ödənilib və hazırda ona qarşı heç bir narazılıq yoxdur. Bu əsasla o, barəsində olan sadələşdirilmiş icraat materialı üzrə cinayət təqibinə xitam verilməsini məhkəmədən xahiş edib.
Məhkəmə iclasında iştirak edən Elnarə İsmiyev də ərizə ilə çıxış edərək təqsirləndirilən şəxslə barışdığını, ona dəymiş ziyanın tam ödənildiyini və artıq ona qarşı heç bir şikayət və tələbinin olmadığını bildirib.
Kamal Məmmədov
