Texas sakini Daniel Moreno-Qama Altmanın malikanəsinə “Molotov kokteyli” atmaqda, süni intellekt rəhbərlərinə qarşı zorakılığa çağırış edən manifest saxlamaqda və daha ağır maddələrlə üzləşməkdə ittiham olunur...
ABŞ-nin Texas ştatında yaşayan 20 yaşlı Daniel Moreno-Qamaya OpenAI rəhbəri Sem Altmanın evinə hücumla bağlı adam öldürməyə cəhd və qəsdən yanğın törətməyə cəhd maddələri üzrə ittiham elan edilib. Məlumata görə, aprelin 10-da o, Altmanın iqamətgahının darvazasına yandırıcı qarışıq doldurulmuş şüşə atıb.
Poliqon xəbər verir ki, bu barədə CNN telekanalı məlumat yayıb.
Məlumata əsasən, dairə prokurorluğu gənci həm Sem Altmanı, həm də hücum zamanı evdə olan mühafizəçini öldürməyə cəhddə ittiham edib. Federal səviyyədə isə ona qeydiyyata alınmamış odlu silaha sahiblik və partlayıcı maddələrdən istifadə etməklə əmlakı məhv etməyə cəhdlə bağlı ittihamlar irəli sürülüb.
İstintaq orqanları bildirir ki, Moreno-Qamaya qarşı terror aktı maddəsi ilə də ittiham irəli sürülməsi mümkündür. ABŞ-nin Kaliforniyanın Şimal dairəsi üzrə prokuroru Kreyq Missakian mətbuat konfransında deyib ki, əgər sübutlar hücumun dövlət siyasətini dəyişdirmək, hökumətə və ya digər vəzifəli şəxslərə təzyiq göstərmək məqsədi ilə törədildiyini göstərsə, həmin maddə də tətbiq oluna bilər.
ABŞ Ədliyyə Nazirliyinin yaydığı məlumata görə, şübhəlinin evində süni intellektə qarşı yönəlmiş manifest aşkarlanıb. Həmin sənəddə süni intellekt şirkətlərinin baş icraçı direktorlarının və onların investorlarının öldürülməsinə çağırışlar yer alıb. Mətndə müxtəlif şəxslərin adları və ünvanlarının da sadalandığı bildirilir. İstintaqın versiyasına görə, bu sənədin surəti onun kollec üzrə keçmiş tələbə yoldaşlarına da göndərilib.
Aprelin 14-də San-Fransisko dairə prokurorluğu Moreno-Qamanın məhkəməyədək girov hüququ olmadan həbsdə saxlanılması üçün vəsatət qaldırmağı planlaşdırır.
Sem Altmanın evinə son bir həftə ərzində iki dəfə hücum edildiyi qeyd olunur. İkinci hadisə aprelin 12-nə keçən gecə baş verib. Mühafizəçilər yoldan keçən Honda markalı avtomobildən atəş açıldığını eşidiblər. Müşahidə kameraları avtomobildə olan sərnişinin ev istiqamətində atəş açdığını qeydə alıb. Polis hadisə ilə bağlı 25 yaşlı qadını və 23 yaşlı kişini saxlayıb.
Baş verənlər ABŞ-də süni intellekt sənayesinin aparıcı fiqurlarına qarşı təhlükəsizlik risklərinin artdığına dair narahatlıqları daha da gücləndirib. Xüsusilə hücum edən şəxsin evindən aşkarlandığı deyilən manifestdə konkret şəxslərin və ünvanların yer alması istintaqın işin motivlərini daha geniş miqyasda araşdırmasına səbəb olub.
Poliqon.info
