Rusiyada "Telegram" messencerinin sürətinin zəifləməsi fonunda Asiya platformaları olan "WeChat" və "KakaoTalk"un auditoriyası kəskin şəkildə artıb.
Azreform.info xəbər verir ki, bu barədə "Kommersant" nəşri rabitə operatorlarının və analitiklərin məlumatlarına istinadən bildirib.
Nəşrdəki məlumatlara görə, 2026-cı ilin birinci rübündə rusiyalıların alternativ tətbiqlərə olan ümumi tələbatı 50% artıb. Cari ilin mart ayında Koreyanın mesajlaşma tətbiqinin Rusiya Federasiyasındakı auditoriyası 82%, Çinin "WeChat" tətbiqi isə 15% böyüyüb.
"Spikatel" kiberhədələrin monitorinqi mərkəzinin aparıcı analitiki Aleksey Kozlovun izah etdiyi kimi, "Telegram" rusiyalılar üçün xəbər oxuma platforması olaraq qalır. Mesaj göndərmək və zənglər etmək üçün isə Rusiya sakinləri alternativ rabitə kanallarını seçirlər.
Fevral ayından bəri rusiyalılar kütləvi şəkildə "Telegram" messencerinin işindəki nasazlıqlar barədə məlumat verirlər. "Roskomnadzor" xidmətin işinin Rusiya qanunlarının pozulması səbəbindən məhdudlaşdırıldığını təsdiqləyib və platformaya qarşı tədbirlərin davam etdiriləcəyini bildirib.
Aprelin əvvəlində "Telegram"ın təsisçisi Pavel Durov bəyan edib ki, Rusiyada bloklanmadan sonra belə on milyonlarla insan hər gün messencerdən istifadə edir, girişin məhdudlaşdırılması cəhdləri isə yalnız "rəqəmsal müqaviməti" gücləndirib. Bu arada Dövlət Dumasında messencerin taleyi ilə bağlı aydın cavab verməyən "Roskomnadzor"dan izahat tələb olunub.
