Artıq bildiyiniz kimi, dünən səhər Ermənistan ekspert dairələri, vətəndaş cəmiyyəti və medianın 20 nümayəndəsindən ibarət qrup delimitasiya və demarkasiya olunmuş hissədən Azərbaycan sərhədini keçib. Həmkarımın dediyi kimi, artıq bu, özü-özlüyündə mühüm simvolik addımdır. Bu, sülhün nə qədər real olduğunu və Vaşinqtonda, ondan əvvəl isə liderlərimizin Əbu-Dabidəki görüşündə razılaşdırılmış sülh gündəliyinin həyata keçirilməsinə nə qədər yaxın olduğumuzu təsdiq edir.
AZƏRTAC xəbər verir ki, bu barədə “Sülh Körpüsü” təşəbbüsünün koordinatoru, Ermənistan Şurasının prezidenti Areq Koçinyan Qəbələdə “Sülh Körpüsü” təşəbbüsü çərçivəsində təşkil olunmuş, Azərbaycan və Ermənistan vətəndaş cəmiyyəti nümayəndələrinin iştirakı ilə ikitərəfli dəyirmi masa çərçivəsində keçirilən mətbuat konfransında bildirib.
“Sülh Körpüsü” təşəbbüsü vətəndaş cəmiyyəti nümayəndələri, ekspertlər və media arasında əlaqə və dialoq qurmağı hədəfləyən bir layihədir. Hər iki ölkədə - Ermənistanda və Azərbaycanda cəmiyyətləri 30 ildən çox davam edən münaqişədən sonra sülhə hazırlamaq məqsədimizdir. Bu, zəruri və vacibdir. Bu gün “Sülh Körpüsü” təşəbbüsünün dördüncü görüşünün keçirilməsi mühüm nailiyyətdir. Biz yeni başlayanda - birinci və ikinci səfərlər zamanı - bu təşəbbüsün davam etdirilməsi və təsis edilməsi ehtimalı ilə bağlı çoxlu tənqid və şübhələr var idi. Hazırda dördüncü görüşün keçirilməsi və dayanmaq niyyətində olmamağımızın özü tənqidin əsassız olduğunu göstərir. Bununla yanaşı, təşəbbüs müəyyən bir normallaşma səviyyəsinə çatıb. Əlaqələrimiz, vaxtaşırı görüşlərimiz və cəmiyyətlərimizlə apardığımız “ev tapşırığı” tədricən adi bir şeyə çevrilir. Yaxın gələcək üçün bir sıra təşəbbüslər barədə razılığa gəlmişik. Bunlara məqalələr, tədqiqatlar və əməkdaşlığımızın əlavə məhsullarına çevriləcək birgə tədbirlər daxildir”, - deyə o əlavə edib.
