Redaktor.az portalından verilən məlumata görə, ain.az xəbər yayır.
"Prezident İlham Əliyevin Gürcüstana səfəri zamanı səsləndirdiyi bəyanat Azərbaycanın müasir dövlətçilik modelinin mahiyyətini yığcam, lakin dərin məzmunla ifadə edən mühüm siyasi sənəd kimi dəyərləndirilə bilər. Azərbaycan artıq Cənubi Qafqazda passiv iştirakçı deyil, prosesləri formalaşdıran və istiqamətləndirən strateji dövlət kimi çıxış edir. Burada əsas diqqətçəkən məqam dövlətlərarası münasibətlərin emosional ritorika deyil, qarşılıqlı hörmət, suverenlik və ortaq maraqlar əsasında qurulmasıdır ki, bu da dövlətçilik düşüncəsinin yetkin mərhələyə çatdığını nümayiş etdirir".
Bunu Redaktor.az-a deputat Rövşən Muradov Prezident İlham Əliyevin Gürcüstana etdiyi dövlət səfərindən danışarkən bildirdi.
O vurğuladı ki, bu səfər Azərbaycan-Gürcüstan münasibətlərinin keyfiyyətcə yeni mərhələyə yüksəldiyini bir daha təsdiqləyir:
"Qarşılıqlı ərazi bütövlüyünün dəstəklənməsi, beynəlxalq təşkilatlar çərçivəsində koordinasiya olunmuş mövqelərin sərgilənməsi və uzun illərə söykənən etimad mühiti iki ölkə arasında münasibətlərin strateji xarakter daşıdığını göstərir. İqtisadi müstəvidə müşahidə olunan dinamika bu siyasi xəttin konkret nəticələrini ortaya qoyur. Gürcüstana yönəldilmiş iri həcmli investisiyalar, artan ticarət dövriyyəsi və yeni layihələr üzrə müzakirələr Azərbaycanın regionda iqtisadi təsir imkanlarını genişləndirdiyini göstərir. Bu yanaşma iqtisadi diplomatiyanın dövlət siyasətinin mühüm alətinə çevrildiyini təsdiqləyir. İqtisadi əlaqələrin dərinləşməsi yalnız qarşılıqlı fayda yaratmaqla kifayətlənmir, eyni zamanda siyasi sabitliyi möhkəmləndirən və tərəfdaşlığı uzunmüddətli edən struktur yaradır. Beləliklə, iqtisadi faktor siyasi münasibətlərin davamlılığını təmin edən əsas dayaqlardan birinə çevrilir. Cənab Prezident İlham Əliyevin vurğuladığı kimi, Cənubi Qafqazda yeni geosiyasi reallığın formalaşması ideyası xüsusi əhəmiyyət daşıyır. Bu fikir regionun postmünaqişə mərhələsində inkişaf istiqamətlərini müəyyən edən konseptual yanaşma kimi çıxış edir. Sülhün yalnız hüquqi sənədlərlə deyil, iqtisadi və kommunikasiya əlaqələri vasitəsilə möhkəmləndirilməsi yanaşması müasir beynəlxalq münasibətlər sistemində qarşılıqlı asılılıq modelinin praktiki tətbiqidir. Bu kontekstdə regional əməkdaşlığın genişləndirilməsi, nəqliyyat və ticarət əlaqələrinin gücləndirilməsi sabitliyin əsas təminat mexanizminə çevrilir və dövlətlər arasında etimadı dərinləşdirir".
Deputatın sözlərinə görə, səfər enerji və nəqliyyat sahəsində əldə olunmuş nailiyyətlər Azərbaycanın geoiqtisadi mövqeyini keyfiyyətcə yeni səviyyəyə yüksəldir.
"Azərbaycan artıq yalnız enerji resursları ixrac edən dövlət deyil, həm də regional və qlobal miqyasda enerji təhlükəsizliyinə və logistika əlaqələrinə töhfə verən strateji mərkəz kimi çıxış edir. Mövcud infrastruktur layihələri ölkənin beynəlxalq çəkisini artırmaqla yanaşı, onun iqtisadi və siyasi müstəqilliyini möhkəmləndirir. Bununla belə, bu model paralel şəkildə alternativ marşrutların inkişafını və çoxşaxəli əməkdaşlıq siyasətini tələb edir ki, bu da uzunmüddətli dayanıqlılığın əsas şərtlərindən biridir.
Cənab Prezident İlham Əliyevin Gürcüstan səfəri və bu səfər çərçivəsində səsləndirilən bəyanat Azərbaycan dövlətçiliyinin əsas sütunlarını suverenlik, iqtisadi dayanıqlılıq, regional əməkdaşlıq və strateji uzaqgörənliyi sistemli şəkildə əks etdirən mühüm siyasi hadisə kimi çıxış edir. Bu yanaşma Azərbaycanın regionda yalnız iştirak edən deyil, eyni zamanda istiqamət verən və prosesləri formalaşdıran aparıcı güc kimi mövqeyini daha da möhkəmləndirir və onun gələcək inkişaf trayektoriyasını müəyyən edən əsas strateji xətt kimi dəyərləndirilir", - deyə Rövşən Muradov yekunlaşdırdı.
NURİYYƏ
Daha ətraflı məlumat və yeniliklər üçün ain.az saytını izləyin.
