ABŞ Müdafiə Nazirliyinin “The Wall Street Journal” tərəfindən dərc edilən son rəsmi hesabatına əsasən, beş həftə davam edən “Epik Qəzəb” hərbi kampaniyası zamanı 13 ABŞ hərbçisinin ölümü təsdiqlənib.
Musavat.com xəbər verir ki, onlardan 7 nəfəri birbaşa döyüş toqquşmalarında, 6 nəfəri İranın Küveytdəki obyektlərə endirdiyi zərbələr nəticəsində həlak olub, daha bir hərbçi isə Səudiyyə Ərəbistanında aldığı yaralardan dünyasını dəyişib.
Pentaqonun cümə axşamına olan məlumatına görə, yaralıların sayı 365 nəfər təşkil edir.
Bununla belə, operativ monitorinq mənbələri, o cümlədən "Wikipedia"nın ixtisaslaşmış bölmələri daha yüksək rəqəmlər - 15 ölü və 520-dən çox yaralı olduğunu göstərir.
Bu fərq rəsmi statistikanın hələlik son 24 saatın məlumatlarını əhatə etməməsi, həmçinin ailələrin məlumatlandırılması prosesinin davam etməsi ilə izah olunur.
Hərbi aviasiya itkilərinə gəlincə, aprelin 3-də İran hava hücumundan müdafiə qüvvələri tərəfindən ABŞ-ın "F-15E Strike Eagle" qırıcısı vurulub.
Genişmiqyaslı axtarış-xilasetmə əməliyyatı nəticəsində xüsusi təyinatlılar pilotlardan birini təxliyə edə bilsələr də, ekipajın digər üzvü, silah sistemləri üzrə zabit rəsmən itkin düşmüş hesab olunur.
Bundan əlavə, Hörmüz boğazı yaxınlığında bir "A-10 Thunderbolt II" hücum təyyarəsi qəzaya uğrayıb, pilot katapult edərək sağ qalıb.
ABŞ-nin regiondakı ümumi maddi itkiləri 17 hərbi obyektə dəyən zərər də daxil olmaqla, minimum 800 milyon dollar dəyərində qiymətləndirilir. Bu rəqəmlərin fonunda prezident Donald Tramp administrasiyası arsenalların doldurulması və Vaşinqtonun 2-3 həftə ərzində başa çatdırmağı planlaşdırdığı əməliyyatın davam etdirilməsi üçün Konqresdən əlavə 200 milyard dollar vəsait tələb edib.
Musavat.com
