Tehran istifadəçi ölkələrlə nəzarət mexanizmi yaratmaq istəyir...
İran Hörmüz boğazından istifadə edən ölkələrlə bu strateji dəniz dəhlizinə nəzarət üzrə xüsusi razılaşmanın bağlanması imkanını nəzərdən keçirir.
Poliqon xəbər verir ki, bu barədə İran hökumətinin İnformasiya Şurasının rəhbəri Elyas Həzrəti açıqlama verib.
Həzrəti bildirib ki, belə bir təşəbbüs regionda təhlükəsizliyin təmin edilməsi və enerji daşımalarının daha sabit şəkildə həyata keçirilməsi məqsədi daşıyır. Analitiklərə görə, bu addım İranın Hörmüz boğazı üzərində təsir imkanlarını institusional səviyyədə gücləndirmək cəhdi kimi qiymətləndirilir.
Elyas Həzrəti çıxışında ABŞ və İsrailin İrana qarşı həyata keçirdiyi hərbi əməliyyatlara da toxunub. Onun sözlərinə görə, Vaşinqtonun əsas məqsədi İranın enerji resursları üzərində nəzarəti ələ keçirmək və ölkədə hakimiyyət dəyişikliyinə nail olmaq olub.
Həzrəti əlavə edib ki, ABŞ bu məqsədlərinə çata bilməyib və bunun əsas səbəblərindən biri İran cəmiyyətində formalaşan birlik və milli həmrəylik olub.
“Milli birlik və xalqın həmrəyliyi Trampın bu hədəfə çatmamasının əsas səbəblərindən biridir”, deyə İranlı rəsmi vurğulayıb.
Ekspertlər hesab edirlər ki, İranın bu cür təşəbbüsləri regionda geosiyasi dinamikanı dəyişə və xüsusilə enerji təhlükəsizliyi ilə bağlı yeni müzakirələrə səbəb ola bilər. Eyni zamanda, Hörmüz boğazının gələcək statusu və idarə olunması məsələsi beynəlxalq gündəmdə daha önəmli mövzuya çevrilir.
Poliqon.info
