“Samsung” hərəkət zamanı yaranan ürəkbulanma və narahatlıq yaşayan istifadəçilər üçün “Hearapy” adlı yeni, ödənişsiz tətbiqini təqdim edib. “Google Play” üzərindən “Android” cihazlara yüklənə bilən bu tətbiq yalnız səs texnologiyası vasitəsilə diskomfort hissini azaltmağı hədəfləyir.
Tətbiqin işləmə mexanizmi kifayət qədər sadədir. “Hearapy” qulaqlıq vasitəsilə təxminən 60 saniyə ərzində 100 Hz tezliyində xüsusi sinusvari səs dalğası yayır. Bildirilir ki, bu səs daxili qulaqda yerləşən və tarazlığa cavabdeh olan vestibulyar sistemi aktivləşdirərək ürəkbulanma və başgicəllənməni zəiflədə bilər. İstifadəçilər səsləndirmə müddətini 40 ilə 120 saniyə arasında dəyişə bilirlər. Qeyd olunur ki, optimal, yəni 60 saniyəlik istifadə bəzi hallarda təsirin 2 saata qədər davam etməsinə səbəb ola bilər.
Şirkətin açıqlamasına görə, bu texnologiya Nagoya University alimlərinin apardığı araşdırmalardan ilham alıb. Tədqiqatlar göstərib ki, müəyyən tezlikdə səslər hərəkətdə olan nəqliyyat vasitəsində, xüsusilə oxu zamanı yaranan narahatlıq və başgicəllənməni azalda bilər. Bununla belə, tətbiqin effektivliyi hər istifadəçidə eyni olmaya bilər. Nəticələr həm fərdi xüsusiyyətlərdən, həm də istifadə olunan qulaqlıqların keyfiyyətindən asılıdır. Samsung daha yaxşı nəticə əldə etmək üçün 80-85 desibel səviyyəsində səs ötürə bilən qulaqlıqlardan istifadəni tövsiyə edir və xüsusilə “Galaxy Buds 4 Pro” modelini ön plana çıxarır.
Ülkər XASPOLADOVA,
“Azərbaycan”
