ABŞ-nin müdafiə naziri “Axmaq Maknamara” adlandırılır, bu isə Vyetnam müharibəsi ilə bağlı tarixi paralellər yaradır...
Poliqon xəbər verir ki, The Independent nəşrinin yazdığına görə, Pentaqon əməkdaşları ABŞ-nin müdafiə naziri Pit Heqseti qeyri-rəsmi olaraq “Axmaq Maknamara” (Dumb McNamara) adlandırırlar. Bu ləqəb ABŞ-nin keçmiş müdafiə naziri Robert McNamaraya istinad edir.
Məlumata görə, bu ifadə zarafat xarakteri daşısa da, ciddi tarixi kontekstə söykənir. Robert Maknamara ABŞ prezidentləri John F. Kennedy və Lyndon B. Johnson dövründə müdafiə naziri olub və Vyetnam müharibəsinin eskalasiyasında əsas fiqurlardan biri kimi tarixə düşüb.
Nəşr qeyd edir ki, həmin dövrdə aparılan siyasət nəticəsində milyonlarla insan həyatını itirib. Müxtəlif qiymətləndirmələrə əsasən, Vyetnam müharibəsi 2 milyondan 3,5 milyona qədər insanın ölümünə səbəb olub. Bu münaqişə tez-tez “Maknamaranın müharibəsi” kimi də adlandırılıb.
Bildirilir ki, Robert Maknamara sonradan öz fəaliyyətinə görə peşmanlıq ifadə edib və müharibənin genişlənməsində oynadığı rolu tənqid edib. Bu səbəbdən Pit Heqsetə verilən ləqəb yalnız zarafat deyil, həm də mümkün tarixi paralellərə işarə kimi qiymətləndirilir.
Məqalədə vurğulanır ki, hazırkı qlobal gərginlik fonunda bu cür müqayisələr ABŞ-nin hərbi-siyasi qərarlarının nəticələri ilə bağlı narahatlıqları bir daha gündəmə gətirir.
Poliqon.info
