İranın Ali Rəhbərinin xarici siyasət məsələləri üzrə ali müşaviri Əli Əkbər Vilayəti ölkəsinə qarşı davam edən hərbi təcavüzdə iştirak edən bütün tərəfləri sərt şəkildə hədələyib.
Musavat.com xəbər verir ki, İRNA agentliyinin yaydığı məlumata görə, Vilayəti İrana qarşı istənilən hücumun iştirakçıları üçün "bumeranq" effekti verəcəyini və zərbənin mütləq onların özünə qayıdacağını bildirib. O, xüsusilə Fars körfəzinin coğrafi mövqeyinin bu cür hərbi müdaxilələr üçün "nəticəsiz qalmayacağını" vurğulayaraq, regionda ABŞ bazalarına ev sahibliyi edən ölkələrə dolayı mesaj göndərib. "İranın milli təhlükəsizliyini təhdid edənlərə zərər vuracaq hadisələrin baş verməsi qaçılmazdır", – deyə Vilayəti əlavə edib.
Qeyd olunur ki, Vilayətinin bu bəyanatını bir neçə gün əvvəl ABŞ-ın İrandakı yeraltı raket anbarlarına endirdiyi "bunker dağıdan" zərbələrə və SEPAH komandanı Əlirza Tənqsirinin öldürülməsinə cavab kimi qiymətləndirirlər. Vilayəti həmçinin qeyd edib ki, İran öz müdafiə hüququndan istifadə edərək münaqişəni "düşmənin təcrübəsi olmayan" yeni cəbhələrə keçirmək iqtidarındadır. Bu açıqlama Yaxın Şərqdəki ABŞ müttəfiqləri arasında, xüsusən də son günlər ərazisindən hücumlar üçün istifadə olunduğu iddia edilən ölkələrdə narahatlığı artırıb. Tehrandakı diplomatik mənbələr bildirir ki, "bumeranq" ifadəsi həm birbaşa raket zərbələrini, həm də regiondakı proksi qüvvələrin (məsələn, Husilər və İraqdakı qruplaşmalar) aktivləşməsini nəzərdə tutur.
Musavat.com
