ABŞ Yaxın Şərq münaqişəsi bitdikdən sonra zədələnmiş və itirilmiş hərbi texnikanın bərpası və ya dəyişdirilməsi üçün təxminən 1,4-2,9 milyard dollar xərcləmək məcburiyyətində qalacaq.
APA xəbər verir ki, bu barədə “The Wall Street Journal” (WSJ) qəzeti məlumat yayıb.
Hesabata görə, səhvən vurulan üç F-15E təyyarəsinin əvəzinə yeni F-15 qırıcılarının alınması 300 milyon dollara başa gələcək. İranın hücumundan sonra təxminən 82,5 milyon dollara başa gələn qəza enişi edən F-35A “Lightning II” təyyarəsinin təmiri də tələb olunacaq.
Qəzaya uğrayan KC-135 yanacaq təyyarəsinin 165 milyon dollara başa gələn KC-46 ilə əvəz olunacağı ehtimal olunur. Bununla belə, bölgədəki digər zədələnmiş təyyarələrin də təmirə ehtiyacı olacaq.
Bundan əlavə, ABŞ İranla münaqişə zamanı hər biri təxminən 16 milyon dollara başa gələn ondan çox MQ-9 “Reaper” dronunu itirib. Onların istehsalı da dayandırılıb və yeni MQ-9B dronlarının hər biri 30 milyon dollara başa gələcək.
İran bir çox Yaxın Şərq ölkəsində radar, rabitə və hava hücumundan müdafiə sistemlərinə ən azı bir neçə zərbə endirib. Qətərin təxminən 1 milyard dollar dəyərində olan AN/FPS-132 erkən xəbərdarlıq sisteminə də zərər vurub.
Qeyd edək ki, yeni AN/TPY-2 radarlarının alınması 300 milyon dollara başa gələcək.
Qəzet onu da qeyd edib ki, “USS Gerald R. Ford” təyyarədaşıyan gəmisindəki yanğından dəyən ziyan hələ də məlum deyil.
