Yaponiya şirkətləri Sony və Honda-nın birgə yaratdığı Sony Honda Mobility şirkəti son illərdə inkişaf etdirdiyi Afeela markalı elektrik avtomobili layihəsini dayandırmaq qərarı verib.
Marja xəbər verir ki, bu qərar, Honda-nın bu ayın əvvəlində ABŞ bazarı üçün nəzərdə tutulan üç elektrik avtomobil layihəsini ləğv etdiyini açıqlamasından sonra gəlib. Bu addımın Yaponiya avtomobil istehsalçısına təxminən 16 milyard dollara başa gələ biləcəyi bildirilir.
Honda bu qərarın səbəbi kimi ABŞ Prezidenti Donald Trampın gömrük tariflərini və Çindən gələn artan rəqabəti göstərib.
Sony Honda Mobility şirkətinin yaydığı açıqlamada qeyd olunub ki, şirkət Afeela sedan və SUV modellərinin istehsalı və dəstəyi üçün Honda-nın müəyyən texnologiyalarından və aktivlərindən istifadə etməyi planlaşdırırdı. Lakin Honda-nın strateji dəyişiklikləri nəticəsində birgə müəssisə artıq bu avtomobillərin inkişafını davam etdirə bilməyəcək vəziyyətə düşüb.
Afeela markalı sedanların bu ilin sonlarında təxminən 90 min dollar başlanğıc qiymətlə bazara çıxarılması planlaşdırılırdı.
Birgə müəssisənin və Tokio ilə Kaliforniyada çalışan yüzlərlə əməkdaşın gələcəyinin necə olacağı isə hələlik qeyri-müəyyəndir. Sony Honda Mobility bildirib ki, Sony və Honda ilə birlikdə layihənin gələcəyini müzakirə etməyə davam edəcəklər və yaxın zamanda gələcək istiqamət, orta və uzunmüddətli strategiya və mobillik sahəsinə töhfələri barədə ortaq açıqlama verəcəklər.
Dünya ilk dəfə Sony-nin avtomobil istehsalına marağını 2020-ci ildə keçirilən Consumer Electronics Show (CES) sərgisində öyrənmişdi. Həmin tədbirdə texnologiya nəhəngi çıxışının sonunda Vision-S adlı konsept avtomobilini nümayiş etdirmişdi.
