Taybey tərəfindən ABŞ-ə sifariş edilən 66 F-16V qırıcısının ilk partiyasının çatdırılması cari ilin sentyabr ayında baş tuta bilər.
Musavat.com xarici mediaya istinadla xəbər verir ki, bu barədə Tayvanın müdafiə departamentinin rəhbəri Qu Lisyun Tayvan parlamentinin deputatlarının suallarını cavablandırarkən bildirib.
Parlamentdə çıxış edən Q.Lisyun "ilk təyyarələrin bu ilin üçüncü rübündə çatdırıla biləcəyini" bildirib. Onun sözləri “Focus Taiwan” informasiya portalı tərəfindən sitat gətirilib.
Adanın müdafiə departamentinin rəhbərinin sözlərinə görə, hazırda ABŞ-də konveyer xəttində 59 F-16V qırıcısı var və "onların sınaqdan keçirilməsi vaxt aparacaq". Daha əvvəl Tayvan mediası ada üçün yığılmış ilk qırıcının ötən həftə ABŞ-yə səfər edən Taybey nümayəndələrinə göstərildiyini bildirib.
Tayvan 2019-cu ildə prezident Donald Trampın birinci müddəti ərzində Vaşinqton tərəfindən təsdiqlənmiş adanın silah təchizatı paketinin bir hissəsi olaraq ABŞ-dən 66 ədəd F-16 Block 70 (F-16V kimi də tanınır) təyyarəsi alıb. Taybeyin ilk təyyarə partiyasını 2023-cü ildə alacağı gözlənilirdi, lakin COVID-19 pandemiyası da daxil olmaqla bir sıra səbəblərə görə qırıcıların çatdırılması gözlənilən müddətdə baş tutmadı. Keçən il Taybey sifariş edilmiş bütün təyyarələri 2026-cı ilin sonuna qədər alacağını gözləyirdi, lakin indi onlar sifariş edilmiş təyyarələrin yalnız bir hissəsinin o vaxta qədər çatdırılacağına inanırlar. Tayvan dəfələrlə Amerika təyyarələrinin tədarükündəki gecikmə ilə bağlı narahatlığını bildirib.
Musavat.com
