ABŞ administrasiyası İranla mümkün sülh razılaşması üçün yeni strateji plan üzərində işləməyə başlayıb.
Musavat.com xəbər verir ki, bu barədə Axios nəşri məlumat yayıb.
Məlumata görə, danışıqlarda ABŞ tərəfini prezidentin xüsusi nümayəndəsi Stiv Uitkoff və müşaviri Cared Kuşner təmsil edir. Vaşinqtonun əsas məqsədi regionda gərginliyi azaltmaq və Tehranla uzunmüddətli razılaşmaya nail olmaqdır.
Hazırlanan plana əsasən, razılaşmanın əsas bəndlərindən biri Hörmüz boğazının yenidən açılmasıdır. Bu addım qlobal enerji bazarları üçün həyati əhəmiyyət daşıyır. Eyni zamanda, İranın yüksək dərəcədə zənginləşdirilmiş uran ehtiyatlarının taleyi də razılaşmanın mərkəzində yer alır.
Plan çərçivəsində İranın nüvə proqramı və ballistik raket potensialı ilə bağlı uzunmüddətli öhdəliklərin müəyyənləşdirilməsi nəzərdə tutulur. Bundan əlavə, Tehranın regiondakı “vəkil qüvvələrə” dəstəyi məsələsi də müzakirə paketinə daxil edilib.
Mənbənin bildirdiyinə görə, tərəflər razılığa gəlmək üçün müəyyən güzəştlərə hazır ola bilərlər. Bununla belə, danışıqların konkret nəticə verib-verməyəcəyi və yekun razılaşmanın əldə olunub-olunmayacağı hələlik qeyri-müəyyən olaraq qalır.
Musavat.com
