Son üç həftə ərzində İran üzərində aparılan hava kampaniyasının gedişi əvvəlcə proqnozlaşdırılan “tükənmə ssenarisi” üzrə inkişaf edirdi.
KONKRET.az xəbər verir ki, İran raket potensialının zəiflədiyinə dair həm İsrail, həm də ABŞ kəşfiyyat məlumatları bunu təsdiqləyirdi. Lakin son 72 saatda buraxılışların qəfil artması Qərb analitiklərini fərqli reallıqla üz-üzə qoyub.
Mütəxəssislərin fikrincə, Tehranın raket qüvvələrinin gözlənilməz davamlılığı ilkin kəşfiyyat qiymətləndirmələrinin yenidən nəzərdən keçirilməsini tələb edir. Əgər əvvəllər mobil buraxılış qurğularının sayının məhdud olduğu düşünülürdüsə, indi bu dinamika gizli təchizat kanallarının mövcudluğuna işarə edir.
Son 24 saatın ən diqqətçəkən hadisəsi isə İranın hava hücumundan müdafiə sistemlərinin ilk dəfə olaraq F-35 Lightning II qırıcısına zərər yetirməsi ilə bağlı məlumatlardır. Bu fakt, müttəfiq qüvvələrin istifadə etdiyi “açıq səma” üstünlüyünün artıq ciddi çağırışlarla üzləşdiyini göstərir.
Kəşfiyyat mənbələri bunu Rusiya ilə Tehran arasında bağlandığı iddia edilən gizli razılaşma ilə əlaqələndirir. Məlumata görə, bu saziş çərçivəsində İrana müasir “Verba” tipli daşınan zenit-raket komplekslərinin verilməsi mümkündür.
Bu şəraitdə Xəzər dənizi strateji “qara yol” rolunu oynamağa başlayıb. Fars körfəzi və Oman körfəzi üzərində nəzarətin ABŞ və İsrail tərəfindən təmin edildiyi bir vaxtda, Xəzər marşrutu Rusiya-İran təchizat xətti üçün əsas alternativə çevrilib.
Məhz bu səbəbdən İsrail Hərbi Hava Qüvvələrinin son zərbələri Xəzərdə yerləşən İran donanmasına yönəlib. Hədəflər arasında hətta tikilməkdə olan gəmilərin də olması Təl-Əvivin bu təchizat xəttini istənilən qiymətə kəsmək niyyətini göstərir.
Geosiyasi baxımdan Vladimir Putin üçün əsas məqsəd İranın qələbəsi deyil, Qərbin resurslarının parçalanmasıdır. Analitiklərə görə, Moskva Tehrana yardımı dozalı şəkildə artıraraq ABŞ və müttəfiqlərinin diqqətini Yaxın Şərqdə saxlamağa çalışır.
Müşviq Tofiqoğlu
KONKRET.az
