ain.az, Cebheinfo saytından verilən məlumata əsaslanaraq xəbər yayır.
Texnologiya milyarderi, sağçı Piter Til aylardır ki, qaçılmaz təhlükə hesab etdiyi şey - Dəccal barədə xəbərdarlıq edib.
“Cebheinfo.az” xəbər verir ki, süni intellekt investoru olan Til nüvə müharibəsi, iqlim dəyişikliyi və süni intellekt kimi ekzistensial risklərdən təhlükəsizlik vəd edən, lakin nəticədə daha da pis bir şeyə - totalitar dünya hökumətinə yol açan bir Dəccal barədə xəbərdarlıq etmək üçün Müqəddəs Kitab peyğəmbərliklərinə istinad etdiyini deyib.
“New York Times” qəzetinin məlumatına görə, o, ideyalarına dəstək qazanmağa çalışdığı yerdə - Vatikanın "dominionu" olan Romada - Katolik Kilsəsi daxilində xristian mütəfəkkirlərinin müqaviməti ilə üzləşir.
Bu həftə Til Dəccal haqqında dörd mühazirə oxumaq üçün Romaya gedib. Bazar günü başlayan tədbirdə onun çıxışlarını təşkil edən mühafizəkar xristian qrupuna görə, o, “gizli qüvvələrin Qərbin qalıqlarını məhv etmək niyyəti üçün amansızcasına işlədiyini" araşdırır.
Buna cavab olaraq, katoliklər son bir həftə ərzində bir neçə məqalədə Tili kəskin şəkildə qınayıblar. Til ötən il San Fransiskoda və yanvar ayında Parisdə oxşar mühazirələr oxuyub və xristian mütəfəkkirlərinin reaksiyası nisbətən az olub.
Lakin onun Vatikana yaxınlığı bəzi Roma katoliklərini daha ciddi reaksiya verməyə sövq edib. Vatikanın süni intellekt üzrə məsləhətçisi Ata Paolo Benanti "Amerika bidəti" adlı essesində Tilin arqumentlərini "narahatedici" adlandırıb.
Ata Benanti belə deyib: “!“PayPal”, “Facebook” və məlumat analitikası firması olan “Palantir”-in təsis edilməsində əsas rol oynayan kapitalist Til öz şirkətlərinin fəaliyyətini asanlaşdırmaq üçün liberal demokratiyanın tənəzzülünü sürətləndirməyə çalışır”.
Ata Benanti hesab edir ki, Til Qərb dəyər sisteminin üç əsas komponenti olan rəqabət, texnologiya və fərdiliyi ciddi təhrif edib.
Fransanın “Le Grand Continent” veb saytında dərc olunmuş essesində Ata Benanti Tilə xitabən onun hərəkətlərini vətəndaş birgəyaşayışının təməllərinə meydan oxuma" kimi təsvir edib.
Son bir həftə ərzində İtaliya yepiskopları təşkilatına məxsus “Avvenire” qəzeti Tilin vizyonunun yaratdığı təhlükə barədə xəbərdarlıq edən bir neçə məqalə dərc edib. Məqalələrdən birində onu "Amerika liberal demokratiyasının yavaş-yavaş öz modelində hazırlanmış yumşaq avtokratiyaya çevrilməsində həlledici iştirakçı" adlandırıblar. Başqa bir materialda isə onu barəsində "xaos agenti" ifadəsi işlədilib.
Dünyəvi qruplar da etiraz ediblər. Belə ki, Tramp əleyhinə qrup olan "Krallar yoxdur" hərəkatının İtaliya şöbəsinin üzvləri Müdafiə Nazirliyinin qarşısında toplaşıblar. Onlar Piter Tilin Romadan çıxarılmasını tələb ediblər.
Til özü isə iddialara cavab olaraq, xristian inancının dünyagörüşünün mərkəzində olduğunu bildirib. O, evangelist xristian ailəsində böyüyüb və inancını "bir qədər heterodoks" kimi təsvir edir.
"New York Times" qəzetinin köşə yazarı Ross Douthat ötən il Tildən Dəccal haqqında soruşanda milyarder ona belə cavab verib: "Nə qədər vaxtımız var?"
O da bildirilir ki, milyarderin Romadakı mühazirələri qismən Şimali İtaliyadan olan mühafizəkar katolik təşkilatı olan Vincenzo Gioberti Mədəniyyət Assosiasiyası tərəfindən təşkil olunub.
İştirak dəvətnamə ilə həyata keçirilib və tədbirin keçiriləcəyi məkan olan şəhər mərkəzindəki Palazzo Orsini Taverna mərasimə qədər gizli saxlanılıb.
Bəzi qonaqların üzərində "Müqəddəs Kitab Dəccal Konfransının qonağı" yazısı olan nişanlar taxıblar. Onların heç biri jurnalistlərin suallarını cavablandırmayıb.
Məlumat üçün bildirək ki, Dəccal İslam dininə görə Qiyamət gününə, Mehdinin zühuruna yaxın çox nəhəng uzunqulağa minib zühur edərək insanları dindən uzaqlaşdıracaq əfsanəvi şəxsdir. Xristian dinində İsa peyğəmbərin düşməni hesab olunur.
Xəzər
“Cebheinfo.az”
Açar sözlər:
Piter Til Dəccal
Problemlərinizi bizə yazın, şahidi olduğunuz hadisələri çəkib göndərin
Ən son xəbərləri və yenilikləri almaq üçün ain.az saytını izləyin.
