Redaktor.az portalından əldə olunan məlumata əsasən, ain.az xəbər verir.
Hazırda ABŞ/İsrail-İran müharibəsi hava zərbələri ilə davam edir. ABŞ və İsrail müharibənin qısa müddətdə bitəcəyini ehtimal etmələrinə baxmayaraq, İranın ciddi müqaviməti bu planı alt-üst edib. Odur ki, hazırda Qərb mətbuatı ABŞ-nin İrana qarşı əməliyyatlarda quru qoşunlarından da istifadə edə biləcəyi ehtimalını gündəmə gətirir.
Mövzu ilə bağlı Redaktor.az-a açıqlamasında hərbi ekspert Anar Şuşalı bildirdi ki, Yaxın Şərqdə gərginliyin artdığı hazırkı mərhələdə hərbi qarşıdurmanın əsas yükünün hava qüvvələrinin üzərinə düşdüyü açıq görünür:
"Xüsusilə ABŞ və İsrail tərəfindən İran ərazisində mümkün hədəflərə qarşı uzaqmənzilli zərbə vasitələri, pilotsuz uçuş aparatları və yüksək dəqiqlikli raketlərdən istifadə edilməsi müasir müharibənin xarakterini müəyyənləşdirən əsas amillərdəndir. Bununla belə, Qərb mediasında zaman-zaman quru qoşunlarının da əməliyyatlara cəlb olunması ehtimalının müzakirə edilməsi münaqişənin gələcək inkişaf istiqamətləri ilə bağlı yeni suallar doğurur. Müasir hərbi strategiyada böyük dövlətlərin birbaşa genişmiqyaslı quru müharibəsindən yayınmağa çalışması təsadüfi deyil. Quru əməliyyatları həm canlı qüvvə itkilərinin çox olması, həm də daxili siyasi və ictimai təzyiqlərin artması baxımından riskli hesab olunur. Bunun əvəzində texnoloji üstünlük, kəşfiyyat imkanları və yüksək dəqiqlikli silah sistemləri vasitəsilə məsafədən təsir göstərmək daha effektiv və idarəolunan model kimi qəbul edilir. Bu baxımdan, hava zərbələri ilə strateji obyektlərin sıradan çıxarılması, hərbi infrastrukturun zəiflədilməsi və qarşı tərəfin manevr imkanlarının məhdudlaşdırılması hazırkı qarşıdurmanın əsas məntiqini təşkil edir".
Müsahibimiz həmçinin əlavə etdi ki, müəyyən şərtlər daxilində quru qoşunlarının istifadəsi tam istisna edilmir:
"Əgər əməliyyatların məqsədi yalnız zərbə vurmaq deyil, konkret ərazilər və ya strateji obyektlər üzərində fiziki nəzarət qurmaq olarsa, quru qüvvələrinin iştirakı zəruri ola bilər. Xüsusilə nüvə obyektləri, raket bazaları və mühüm logistika mərkəzlərinin tam təhlükəsizləşdirilməsi bəzən yalnız hava hücumları ilə mümkün olmur. Digər tərəfdən, münaqişənin siyasi hədəfləri genişlənər və rejim dəyişikliyi kimi daha radikal ssenarilər gündəmə gələrsə, tarix göstərir ki, bu tip məqsədlərə quru əməliyyatları olmadan nail olmaq olduqca çətindir. Eyni zamanda, belə bir müdaxilənin qarşısında ciddi maneələr mövcuddur. İranın geniş əraziyə malik olması, mürəkkəb coğrafi şərait, çoxsaylı ehtiyat qüvvələr və asimmetrik müharibə təcrübəsi quru əməliyyatlarını həm uzunmüddətli, həm də yüksək riskli edə bilər. Bundan əlavə, regionda fəaliyyət göstərən müxtəlif silahlı qruplar vasitəsilə qarşı tərəfə dolayı cavab imkanlarının olması münaqişənin coğrafiyasını genişləndirə və onu nəzarətdən çıxara bilər. Bu isə yalnız hərbi deyil, həm də iqtisadi və siyasi baxımdan qlobal nəticələr doğura bilər.
Nəticə etibarilə, hazırkı mərhələdə ABŞ və İsrailin İrana qarşı birbaşa genişmiqyaslı quru əməliyyatı keçirməsi ehtimalı nisbətən aşağı qiymətləndirilir. Mövcud strategiya daha çox hava üstünlüyü, texnoloji imkanlar və məhdud zərbə taktikasına əsaslanır. Bununla belə, müharibələrin dinamik xarakter daşıdığı nəzərə alınarsa, əməliyyat məqsədlərinin dəyişməsi və ya eskalasiya ehtimalı gələcəkdə quru faktorunu yenidən gündəmə gətirə bilər. Bu baxımdan, əsas müəyyənedici sual qarşıdurmanın miqyası və siyasi hədəflərinin hansı istiqamətdə formalaşacağı ilə bağlıdır".
Nuriyyə NATİQQIZI
Hadisənin gedişatını izləmək üçün ain.az saytında ən son yeniliklərə baxın.
