Britaniyada fəaliyyət göstərən İnformasiya Davamlılığı Mərkəzinin açıqladığı məlumata görə, 2024-cü ilin əvvəlindən bəri Ukrayna hava hücumundan müdafiə sistemləri Rusiyanın buraxdığı ballistik raketlərin yalnız 19 faizini zərərsizləşdirə bilib. Eyni dövrdə isə uzunmənzilli dronların təxminən 88 faizi vurulub.
Məlumata görə, Ukrayna ordusu bahalı raket və sursat çatışmazlığını müxtəlif innovativ müdafiə üsulları ilə kompensasiya etməyə çalışır. Bu çərçivədə köhnə pervaneli təyyarələr modernləşdirilərək dronların məhv edilməsi üçün istifadə olunur. Həmçinin digər pilotsuz uçuş aparatlarını üzərində və ya yaxınlığında partlatmaqla zərərsizləşdirən xüsusi dronlar hazırlanıb. Bildirilir ki, bu texnologiyalara Fars körfəzi ölkələri də maraq göstərir və onları Ukraynadan almaq niyyətindədir.
Ukrayna eyni zamanda elektron müharibə imkanlarını genişləndirərək dronların rabitə siqnallarını boğmaq və ya təqlid etmək üsullarından istifadə edir. Bundan başqa, raketdən müdafiədə uzun müddət səmərəsiz sayılan qısa məsafəli hədəflərə qarşı güllə əsaslı sistemlərin tətbiqi də genişləndirilib.
Ukrayna Hərbi Hava Qüvvələrinin nümayəndəsi, polkovnik Yuri İqnat bildirib ki, bu proses Ukrayna üçün ağır təcrübə olsa da, digər ölkələr üçün mühüm dərs rolunu oynayır.
İran dronları ilə mübarizə bahalıya başa gəlir
Məlumata görə, İran istehsalı olan “Şəhid” tipli dronlara qarşı mübarizə bir sıra ölkələrin hərbi arsenalına ciddi yük yaradır. Xüsusilə Dassault Rafale qırıcılarının bu dronları məhv etmək üçün istifadə etdiyi raketlərin yüksək qiyməti Fransa hərbi rəhbərliyini narahat edir.
Eyni zamanda Kyodo News agentliyinin məlumatına görə, Yaponiya hökuməti müdafiə qabiliyyətini gücləndirmək məqsədilə Ukraynada istehsal olunan hücum dronlarının alınması imkanını nəzərdən keçirir.
