Azertag saytına istinadən ain.az xəbər verir.
Paris, 16 mart, AZƏRTAC
Fransanın paytaxtı Parisdə bazar günü keçirilən il bələdiyyə seçkilərinin birinci turu sağ düşərgə üçün uğursuzluqla yadda qalıb.
AZƏRTAC xəbər verir ki, sosialist namizəd Emmanuel Qrequar lider olub və ikinci tura ən güclü mövqedə keçib.
“Ipsos-BVA-Cesi” məktəbinin “France Télévisions”, “Radio France” və “LCP-Public Sénat” üçün hazırladığı ilkin qiymətləndirməyə görə, Emmanuel Qrequar 37,4 faiz səs toplayıb.
Sağ düşərgənin namizədi Raşida Dati, Respublikaçılar və MoDem partiyaları tərəfindən dəstəklənsə də, 25,5 faiz səslə ikinci yerdə qərarlaşıb və rəqibindən xeyli geri qalıb.
Birinci turun nəticələrinə görə, paytaxtda ikinci turda dörd namizədin iştirak edəcəyi gözlənilir. Üçüncü yeri Sofia Çikiru tutur. “Əyilməz Fransa” partiyasının namizədi 12 faiz səslə ikinci tura vəsiqə qazanıb.
Dördüncü mövqedə isə Pyer-İv Burnazel qərarlaşıb. “Horizons” və “Renaissance” partiyaları tərəfindən dəstəklənən namizəd 11,7 faiz səs əldə edərək Paris meri postu uğrunda mübarizədə qalmaq imkanını saxlayıb.
Bu seçkilərin əhəmiyyətli göstəricilərindən biri də iştirak səviyyəsidir. Parisdə seçici fəallığı 58,5 faiz olub.
Hazırkı vəziyyətə görə ikinci turda dörd əsas namizəd yarışa bilər, lakin namizədlərin siyahıları ilə bağlı son qərarlar çərşənbə axşamı saat 18:00-a qədər dəyişə bilər. Bu müddətdə mümkün ittifaqlar və ya namizədlərin geri çəkilməsi ikinci turun siyasi mənzərəsini dəyişə bilər.
Bu il paytaxtda ilk dəfə yeni seçki sistemi tətbiq olunur. Yeni qaydaya əsasən, parisli seçicilər eyni vaxtda iki səs veriblər: biri bələdiyyə şurası üzvləri, digəri isə rayon şuraları üçün.
Ən mühüm dəyişiklik isə mer seçkilərinin artıq rayonlar üzrə deyil, bütün şəhər üzrə keçirilməsidir. Beləliklə, bələdiyyə şurası üzvləri birbaşa seçilir və hər səs paytaxtın bütün rayonlarında eyni çəkiyə malik olur.
Bələdiyyə seçkilərinin ikinci turu martın 22-də keçiriləcək.
Ən son xəbərləri və yenilikləri almaq üçün ain.az saytını izləyin.
