Abel Məhərrəmov,
akademik, Əməkdar elm xadimi

Azərbaycanın müasir xarici siyasət kursu cənab Prezident İlham Əliyevin rəhbərliyi altında özünün ən qüdrətli və məhsuldar dövrünü yaşayır. Dövlət başçısının uzaqgörən strategiyası və qətiyyətli diplomatik gedişləri nəticəsində Azərbaycan bu gün regionun mütləq lideri, beynəlxalq arenanın isə əvəzolunmaz tərəfdaşına çevrilmişdir. Martın 11-də Avropa İttifaqı Şurasının Prezidenti Antonio Koşta ilə keçirilən görüş və səsləndirilən bəyanatlar, Prezident İlham Əliyevin həyata keçirdiyi müstəqil xarici siyasətin növbəti parlaq qələbəsidir. Bu görüş bir daha sübut etdi ki, rəsmi Bakı ilə Brüssel arasındakı münasibətlər artıq sadə tərəfdaşlıq deyil, qarşılıqlı etimada və qlobal maraqlara söykənən sarsılmaz bir strateji müttəfiqlik səviyyəsinə yüksəlmişdir.

Dövlət başçısının bəyanatında yer alan faktlar Azərbaycanın xarici siyasətində üç əsas sütunu qabardır: iqtisadi inteqrasiya, enerji təhlükəsizliyi və Ermənistanla real sülh prosesi.

Prezidentin açıqladığı statistik rəqəmlr – cari ilin yanvarında ticarət dövriyyəsinin 50 faizinin məhz Avropa İttifaqı (Aİ) ilə bağlı olması – Azərbaycanın iqtisadi vektorunun hara yönəldiyini aydın göstərir. Bu, sadəcə mal mübadiləsi deyil, həm də investisiya axınının qarşılıqlı xarakter alması deməkdir. Azərbaycan artıq təkcə sərmayə qəbul edən deyil, həm də Avropa bazarlarına investisiya yatıran aktiv oyunçuya çevrilib.

Cənab Prezident İlham Əliyevin müəllifi olduğu enerji diplomatiyası bu gün Avropanın enerji xəritəsini yenidən formalaşdıran əsas faktordur. Dövlət başçısı bəyanatında xüsusi olaraq vurğuladı ki, Azərbaycan qazını qəbul edən ölkələrin sayı artıq 16-ya çatmışdır ki, bunun da 10-u Avropa İttifaqının üzvüdür. Bu, sadəcə rəqəmlər deyil, Prezidentin uzaqgörənliyi sayəsində qurulan nəhəng bir etimad infrastrukturudur. Növbəti 2-3 il ərzində hasilatın minimum 10 milyard kubmetr artırılması planı Azərbaycanı Avropanın enerji təhlükəsizliyinin "onurğa sütunu"na çevirir. Lakin cənab İlham Əliyevin strateji baxışı təkcə qaz ixracı ilə məhdudlaşmır; o, Azərbaycanı həm də "yaşıl enerji" inqilabının mərkəzinə daşıyır. Ölkəmizdəki 300 günəşli gün və tükənməz külək potensialından istifadə edərək 6-8 giqavatlıq bərpaolunan enerjinin Avropaya ixrac edilməsi hədəfi, Azərbaycanın gələcəyin ekoloji təmiz dünya nizamında da əsas söz sahibi olacağını təmin edir. Bu, ölkəmizi ənənəvi yanacaq ixracatçısından müasir, yüksək texnoloji enerji qovşağına transformasiya edən dahi bir siyasətin nəticəsidir.

Cənubi Qafqazda formalaşan yeni siyasi arxitektura birbaşa cənab Prezident İlham Əliyevin sarsılmaz iradəsinin və yüksək diplomatik məharətinin məhsuludur. Dövlət başçısı bəyanatında regionda cəmi yeddi aydır hökm sürən real sülhün bəhrələrini diqqətə çatdıraraq, sülhün sadəcə kağız üzərində deyil, əməli müstəvidə qurulduğunu bütün dünyaya nümayiş etdirdi. Ermənistana mühüm neft məhsullarının tədarükünə başlanılması və Azərbaycan ərazisindən keçən tranzit yollardakı məhdudiyyətlərin tamamilə aradan qaldırılması, İlham Əliyevin bölgədə yaratdığı "yeni sülh modeli"nin bariz nümunəsidir. Bu addımlar göstərir ki, Azərbaycan qalib dövlət olmasına baxmayaraq, regionun ortaq rifahı və inkişafı naminə ən humanist və konstruktiv addımları atan tərəfdir. Cənab Prezidentin bu uzaqgörən yanaşması Orta Dəhlizin tam gücü ilə işləməsinə, Ermənistanla münasibətlərin normallaşmasına və bütün Avrasiya qitəsi üçün təhlükəsiz nəqliyyat-logistika imkanlarının açılmasına xidmət edir.

Yekun olaraq qeyd etmək olar ki, Prezident İlham Əliyevin rəhbərliyi ilə Azərbaycan bu gün öz tarixinin ən şərəfli və qüdrətli səhifələrini yazır. Dövlət başçısının həyata keçirdiyi qətiyyətli və balanslaşdırılmış siyasət ölkəmizi beynəlxalq münasibətlər sistemində subyektdən aktiv oyunçuya çevirmişdir. Bakıda səslənən bəyanatlar bir daha təsdiq edir ki, cənab İlham Əliyev həm qlobal enerji təhlükəsizliyinin qarantı, həm də Cənubi Qafqazda ədalətli və daimi sülhün baş memarıdır. Avropa İttifaqı ilə günü-gündən möhkəmlənən bu strateji tərəfdaşlıq təkcə Azərbaycanın bugünkü uğurlarının deyil, həm də gələcək nəsillərin təhlükəsiz, sabit və çiçəklənən bir dövlətdə yaşamasının ən böyük təminatıdır.