Rumıniya prezidenti Nikuşor Dan yaxın və orta perspektivdə ölkə ərazisində nüvə silahının yerləşdirilməsi ehtimalını istisna edib.
AFN.az xarici mediaya istinadən xəbər verir ki, "Rumıniya NATO-ya daxil olduğu andan ABŞ-ın təqdim etdiyi NATO nüvə çətiri tərəfindən qorunur", - deyə Dan Varşavada keçirdiyi mətbuat konfransında Fransanın birgə nüvə çəkindirmə vasitələrində iştirak təklifi ilə bağlı sualı cavablandırarkən xatırladıb. O vurğulayıb ki, NATO-nun nüvə çətiri altında olmaq Rumıniya ərazisində nüvə xarakterli elementlərin mövcudluğunu nəzərdə tutmur və orta perspektivdə Rumıniya torpaqlarında nüvə komponentlərinin yerləşdirilməsindən söhbət gedə bilməz.
"Bizim Rumıniyada fransız hərbçiləri var və buna görə minnətdarıq", - deyə Dan qeyd edib. O bildirib ki, Fransa ilə münasibətlər mürəkkəb təhlükəsizlik kontekstində inkişaf edir və hərbi sahədən kənar müstəsna elementlər meydana çıxdıqda bu barədə ictimaiyyətə məlumat veriləcək.
