İngiltərə Premyer Liqasının 29-cu turunda səfərdə “Nyukasl”a 1:2 hesabı ilə uduzan “Mançester Yunayted”in kapitanı Brunu Fernandeş məhsuldar ötürmə ilə yadda qalıb.
Msport.az xəbər verir ki, bu assist portuqaliyalı yarımmüdafiəçi üçün cari mövsüm çempionatda 14-cü olub.
Bir mövsüm ərzində MY forması ilə İPL-də daha çox məhsuldar ötürməyə yalnız Devid Bekhem imza atıb. Sabiq futbolçu 1999/2000 “futbol ili”ndə 15 dəfə komanda yoldaşlarının fərqlənməsinə şərait yaradıb.
Cari mövsüm bütün turnirlərdə 28 matça çıxan Brununun hesabında 7 qol və 15 assist var. Onun klubu ilə müqaviləsinin müddəti 2027-ci ilin yayına qədər nəzərdə tutulub.
Qeyd edək ki, bu yenilgi Kerrikin rəhbərliyi altında MY-nin ilk məğlubiyyətidir. Hazırda 51 xalı olan Mançester komandası turnir cədvəlinin 3-cü pilləsində mövqe tutub.
