Nyu-Yorkda Kolumbiya Universitetinin azərbaycanlı tələbəsi, cümə axşamı federal miqrasiya agentləri tərəfindən universitet ərazisində saxlanılan tələbə, Nyu-York meri Zohran Mamdaninin Ağ Evdə Donald Trampla görüşündə onun taleyini müzakirə etdikdən sonra azad edilib.
Oxuməni.az xəbər verir ki, bu barədə BBC-nin Rus Xidməti məlumat yayıb.
Cümə axşamı ABŞ Daxili Təhlükəsizlik Nazirliyi, o cümlədən Miqrasiya və Gömrük Xidməti (ICE) tərəfindən federal agentlərin Kolumbiya Universitetinin kampusunda "tələbə vizası 2016-cı ildə Obama administrasiyası tərəfindən dərslərə gəlmədiyi üçün ləğv edilmiş, Azərbaycandan olan qeyri-qanuni əcnəbi Elmira Ağayeva"nı saxladığı elan edilmişdi.
Tələbənin dostları və universitet administrasiyası onu "Eli" kimi tanıyır, “Nyu-York Tayms” yazır. O, siyasi elmlər və neyrobiologiya üzrə təhsil alır. Qəzetin məlumatına görə, onun 29 yaşı var.
Kolumbiya Universiteti və Nyu-York siyasətçiləri bildiriblər ki, ICE agentləri məhkəmə orderi olmadan universitet yataqxanasına daxil olub, özlərini Nyu-York polis əməkdaşları kimi təqdim edərək və "itkin şəxsi" axtarmaq adı altında yalan məlumat veriblər. Daxili Təhlükəsizlik Nazirliyi bu təfərrüatları təkzib edir.
Trampla görüşdən sonra Mamdani sosial şəbəkələrdə yazıb ki, prezident onu axtarıb və yaxın vaxtda Elinin azad ediləcəyi barədə məlumat verib.
Bələdiyyə Başçısının paylaşımından qısa müddət sonra universitet sosial şəbəkələrində və Elinin özü də onun azad edildiyini təsdiqləyiblər. "Bir müddət əvvəl çıxdım, mən təhlükəsizəm və yaxşıyam," - tələbə 107 min izləyicisi olan instaqram hesabında yazıb. "Baş verənlərdən tamamilə şokdayam. Hər şeyi anlamaq üçün bir az vaxta ehtiyacım var."
BBC Ağ Evdən şərh almağa çalışıb.
Mamdani və Trampın Ağ Evdəki görüşü əvvəlcədən elan edilməmişdi. “Nyu-York Tayms” yazır ki, bu görüş hər iki siyasətçinin ictimai qrafiklərində yer almayıb. Mamdani jurnalistlərə heç bir şərh vermədən Ağ Evdən ayrılıb.
Nyu-York merinin mətbuat katibi Anna Bar qəzetə bildirib ki, Mamdani Trampın yanına müxtəlif vaxtlarda miqrasiya orqanları tərəfindən saxlanılan beş şəhər sakininin siyahısı ilə müraciət edib. Mer onlara qarşı qaldırılan işlərin ləğv edilməsini istəyib.
Almaz Həsənli
