Xəlil Şirqolami bəyan edib ki, İran Bakı və İrəvanın birgə həyata keçirməyi planlaşdırdığı "Tramp marşrutu"na (TRIPP) qarşı deyil. İİR-in Ermənistandakı səfirinin sözlərinə görə, Tehranın İrəvanla etibarlı münasibətləri formalaşıb.
Tehran TRIPP ("Tramp marşrutu") nəqliyyat dəhlizi layihəsinin reallaşdırılmasına, bu təşəbbüsün regionda sülhün və imkanların təşviqinə kömək edəcəyi təqdirdə etiraz etmir. Bu barədə İranın Ermənistandakı diplomatik missiyasının rəhbəri Xəlil Şirqolami məlumat verib.
"Amerika tərəfinin İrana münasibətini nəzərə alaraq, bu məsələ ilə bağlı narahatlığımız var idi. Lakin bu məsələ erməni həmkarlarımızla çox dostanə şəraitdə müzakirə olundu" – deyə Xəlil Şirqolami bildirib.
Tehranın diplomatik nümayəndəsinin sözlərinə görə, İrəvan İİR hakimiyyətini əmin edib ki, Ermənistan qarşıdurmada maraqlı deyil və heç vaxt İslam Respublikasının rəqibi olmayacaq. Şirqolami qeyd edib ki, ölkələr arasında qarşılıqlı etimad mövcuddur.
