2016-cı ildən bəri Rusiyada ən azı 50 qubernator müavini cinayət təqibinə məruz qalıb. Çelyabinsk vilayətinin qubernator müavini Andrey Faleyçikin fevralda 1,88 milyon rubl məbləğində rüşvət ittihamı ilə saxlanılması və Krasnodar diyarının keçmiş qubernator müavini Anna Minkovanın bu yaxınlarda fırıldaqçılıq ittihamı ilə həbsi bu tendensiyanın son nümunələrindəndir. Təhlilə görə, bu işlər ölkənin 23 bölgəsinə yayılıb.
Hafta.az yazır ki, 2025-ci il bu baxımdan statistik dönüş nöqtəsi olub. Cəmi bir il ərzində ən azı 15 qubernator müavini cinayət ittihamı ilə üzləşib. Bu rəqəm demək olar ki, əvvəlki beş ilin ümumi sayına bərabərdir. Əvvəlki rekord il 2016-cı ildə yeddi qubernator müavininin həbs olunduğu il idi. O zaman Sankt-Peterburqun keçmiş qubernator müavini Marat Oqanesyana və Kemerovo vilayətindəki vəzifəli şəxslərə qarşı açılan işlər ölkə miqyasında böyük ajiotaj yaratmışdı.
Son on ildə Krasnodar diyarı cinayət araşdırmaları aparılan bölgələrin ön sıralarında olub. Bu bölgədəki yeddi qubernator müavini məhkəmə prosesi ilə üzləşib. Proses 2017-ci ildə tikinti sektorunun rəhbəri Yuri Qritsenkonun həbsi ilə başlayıb, 2025-ci ildə üç keçmiş və hazırkı qubernator müavininə qarşı yeni işlər ilə davam edib. Onlardan biri olan Anatoli Voronovski nəqliyyat sektorunda 2,8 milyard rubl məbləğində rüşvət və korrupsiya iddialarının mərkəzində olub.
"Vedomosti"nin məlumatına görə, rüşvətxorluqda ittiham olunan qubernator müavinləri tərəfindən tələb edilən və ya alınan ümumi məbləğ təxminən 316 milyon rubla çatıb. Məhkəmə qərarları ilə başa çatan işlərdə 16 təqsirləndirilən şəxs üçün müəyyən edilmiş rüşvət məbləği təxminən 119 milyon rubl təşkil edib. Bu şəxslərə tətbiq edilən ümumi cərimələr 310 milyon rublu keçib.
Rüşvətxorluqdan başqa cinayətlərdən dəyən ümumi ictimai ziyan təxminən 578 milyon rubl olaraq qiymətləndirilir. Ekspertlərin fikrincə, bu mənzərə regional administrasiyalarda korrupsiya riskinin sistemli bir problem olaraq qaldığını göstərir.
