Qızılın qiyməti çərşənbə günü Asiya ticarətində yavaş artım göstərib. Əvvəlki sessiyada qızılın qiyməti mənfəət realizasiyası səbəbilə bir qədər düşmüşdü.
Marja xəbər verir ki, investorlar ABŞ-ın yeni tətbiq etdiyi tariflərin təsirini qiymətləndirir və həftənin sonunda keçiriləcək ABŞ–İran danışıqlarını gözləyirlər.
Bakı vaxtı ilə saat 09:20-yə olan məlumata görə, qızılın unsiyasının qiyməti 0,9% bahalaşma ilə 5189 dollar təşkil edib.
“Sarı metal” çərşənbə axşamı ardıcıl dörd sessiyalıq artımdan sonra 1,6% ucuzlaşmışdı.
ABŞ çərşənbə axşamından etibarən qlobal idxala müvəqqəti 10%-lik tarif tətbiq etməyə başlayıb. Donald Tramp administrasiyası bu rüsumu 15%-ə qaldırmaq istiqamətində çalışır. Bu addım qlobal ticarət və inflyasiya ilə bağlı qeyri-müəyyənliyi artırıb.
Tarif qərarı, ötən həftə ABŞ Ali Məhkəməsinin fövqəladə səlahiyyətlər çərçivəsində tətbiq edilmiş əvvəlki genişmiqyaslı rüsumları ləğv etməsindən sonra atılıb. Vaşinqton alternativ hüquqi əsasla tarifləri yenidən tətbiq edib.
Geosiyasi risklər də bazarın diqqətində qalır. ABŞ və İranın cümə axşamı Cenevrə şəhərində Tehranın nüvə proqramı ilə bağlı danışıqların üçüncü raundunu keçirməsi planlaşdırılır.
Bununla belə, qızıldakı bahalaşma ABŞ-da faiz dərəcələrinin yüksək səviyyədə qalacağı gözləntiləri ilə məhdudlaşıb. Çərşənbə axşamı ABŞ Mərkəzi Bankının (FED) iki rəsmisi yaxın müddətdə monetar siyasətin dəyişdirilməsinə meylin zəif olduğunu bildirib. “Uzun müddət yüksək faiz” ssenarisi gəlir gətirməyən aktivlər, o cümlədən qızıl üçün adətən mənfi amil sayılır.
Güclənən dollar da təzyiq yaradır. ABŞ valyutasının son artımını davam etdirməsi dollarla qiymətləndirilən metalları xarici alıcılar üçün daha bahalı edir.
ABŞ Dollar İndeksi çərşənbə axşamı 0,1% artdıqdan sonra əsasən sabit qalıb.
